धितोपत्र बोर्डले गत साउन १ गतेदेखि धितोपत्र सूचीकरण तथा कारोवार नियमावली, २०७५ लागू गर्दै सूचीकृत कम्पनीहरुलाई ए, वि, जि र जेड गरी चार वर्गमा वर्गिकरण गर्ने व्यवस्था गरेको थियो ।
जस अनुसार नेप्सेले सूचिकृत कम्पनीहरुको वर्गिकरण गत असोज ३१ सार्वजनिक गरेको थियो , जसमा कुनै पनि कम्पनी ए र बि वर्गमा परेका थिएनन् भने अधिकांश कम्पनी जि र जेड वर्गमा रहेका थिए ।
नेप्सेले सूचिकृत कम्पनीहरुको वर्गिकरण सार्वजनिक गर्देे ए र बि बर्गमा पर्नुपर्ने कारण बुझाउन ३५ दिनको हदम्याद दिएको थियो । तर ३५ दिनको हदम्याद सकिदा पनि नेप्सेमा सूचिकृत कुनै पनि कम्पनीहरुले वर्गिकरणको समूह ए र बि मा पर्नुपर्ने दाबी नगरेको नेप्सले जनाएको छ ।
कुनै पनि कम्पनीले जी र जेड बर्गमा पर्नु नपर्ने दावी निवेदन नगरेको नेप्से प्रवक्ता मुराहरी पराजुलीले बताए । पराजुलीले सूचीकृत तथा कारोबार नियमावली, २०७५ बमोजिम नै वर्गिकरण गरेकोे र ए र बि समूहमा पर्न आवश्यक प्रकृया पुरा नगर्दा सबै कम्पनी जी र जेड बर्गमा परेको बताए ।
प्रवक्ता पराजुलीले अधिकांश कम्पनीहरुले क्रेडिट रेटिङ्ग नगरेका तथा गरेपनि नेप्सेमा सो विवरण पेश नगरेका कारण ए र वि वर्गमा कुनैपनि कम्पनी नपरेको बताए ।
गत असोज ३१ गतेसम्म सूचीकृत १९६ कम्पनीहरु मध्ये जी वर्गमा २२ वटा कम्पनी परेका छन् भने समूह जेडमा १७४ वटा कम्पनी रेहका छन् ।
अन्तर्राष्ट्रिय अभ्यासलाई समेत दृष्टिगत गरी संगठित संस्थाको चुक्ता पूँजी, प्रतिफल विवरण, वार्षिक साधारण सभाको समय, वित्तीय विवरण प्रकाशन, क्रेडिट रेटिङ्ग र निमायक निकायले तोकेको नियम परिपालनालाई हेरी चार वर्गमा वर्गिकरण गर्ने व्यवस्था रहेको छ ।
सूचीकृत संगठित संस्थाको वर्गिकरण अनुसार लगानीकर्ताले जोखिमको स्तर अनुमान गर्नसक्ने र सोही अनुसार कारोबारलाई सहजीकरण हुने बताइएपनि नेप्सेको वर्गिकरणकै आधारमा लगानी गर्ने स्थिति भने देखिँदैन ।