जोशी हाइड्रोपावर डेभलपमेन्ट कम्पनीले आइतबारदेखि सर्वसाधारणमा बिक्रीमा ल्याएको १५ करोड ५५ लाख २३ हजार ३०० रुपैयाँ बराबरको साधारण शेयरमा दोस्रो दिन सोमबारसम्ममा २५ करोड ७० लाख रुपैयाँ बराबरको आवेदन परेको छ ।

हाइड्रोपावरको शेयर निष्काशन तथा बिक्री प्रबन्धक सिद्धार्थ क्यापिटलले दिएको जानकारी अनुसार सोमबार ५ बजेसम्ममा ३५ हजार बढी आवेदनबाट २५ लाख ७० हजार ७०० कित्ता बढीकाे शेयर माग भएको हो ।

यो सर्वसाधारणमा निष्काशन भएको आर्इपिओको १.६५ गुणा बढी हो । तथ्याङ्क संकलन हुने क्रम जारी रहेकोले आवेदक संख्या अझै बढ्न सक्ने क्यापिटलले जनाएको छ । 

जोशी हाइड्रोपावरले कूल १६ करोड ९० लाख ४७ हजार रुपैयाँ बराबरको १६ लाख ९० हजार ४७० कित्ता निष्काशन गरेकोमा ५० हजार ७१४ कित्ता कर्मचारी र ८४ हजार ५२३ कित्ता सामूहिक लगानी कोषलाई छुट्टाएर बाँकी रहेको १५ लाख ५५ हजार २३३ कित्ता शेयरको लागि सर्वसाधारणमा ल्याएको हो ।

हाईड्रोपावरको शेयरमा न्यूनतम ५० कित्तादेखि अधिकतम ८ लाख कित्तासम्म आवेदन गर्ने व्यवस्था छ । इच्छुक आवेदकले धितोपत्र बोर्डबाट सि आश्वा अनुमति प्राप्त बैंक तथा वित्तीय संस्थाबाट ७७ जिल्लाबाटै आवेदन गर्न सकिन्छ । यसका अतिरिक्त मेरो शेयर प्रयोगकर्ताले इन्टरनेटको प्रयोगबाट यस मार्फत समेत आवेदन दिन सक्नेछन् । 

दोस्रो दिन सम्ममा नै सर्वसाधारणका लागि निष्काशन भएको १.६५ गुणा बढी आवेदन परेकोले यस आईपिओ पनि गोलाप्रथाबाट १० कित्ताका दरले बाँडफाँड हुने पक्का भएको छ । यसअनुसार आईपिओमा पाँच हजारको आवेदन नै प्रयाप्त हुने देखिन्छ ।

कम्पनीको आईपिओले रेटिङ्ग कम्पनी इक्रा नेपालबाट आईपिओ ग्रेडिङ्गमा वित्तीय अवस्था कमजोर जनाउने इक्रा रेटिङ्ग 'इक्रा एनपि आईपिओ ग्रेड ५’ पाएको छ ।

हाइड्रोपावरको आईपिओ मंसिर १९ गते निष्काशन बन्द हुनेछ ।

कस्तो छ आयोजना ?

जोशी हाइड्रोपावरले इलामको पुवाखोलामा तीन मेगावाट क्षमताको अपर पुवा १ जलविद्युत आयोजना सञ्चालन गरिरहेको छ । यस आयोजनाको कूल लागत ५५ करोड ३५ लाख रुपैयाँ रहेको छ । यो लागत अनुसार यस आयोजनाको प्रति मेगावाट लागत १८ करोड ४५ लाख रुपैयाँ हुन आउँछ ।

जोशी हाइड्रोपावरले इलामको पुवाखोलामा पहिलो आयोजनाको रुपमा २०७१ माघ १ गतेबाट ३ मेगावाटको अपर पुवा १ आयोजना सञ्चालनमा सञ्चालन गरिरहेको छ। कम्पनीले उक्त आयोजनाबाट व्यवसायिक रुपमा विद्युत उत्पादन गर्दै आएको छ ।

चुक्ता पुँजी ३७ करोड १४ लाख रुपैयाँ भएको यस कम्पनीले इलामका स्थानीयका लागि जारी पूँजीको १० प्रतिशत र सर्वसाधारणको लागि ३९ प्रतिशत गरि कूल ४९ प्रतिशत शेयर बिक्री गरे पूँजी संकलन गर्नेछ । बाँकी ५१ प्रतिशत पूँजी संस्थापकबाट उठाइनेछ । आयोजना निमार्णका लागि आवश्यक पूँजी बैंक ऋणबाट उपयोग गर्नेछ ।

कम्पनीले आर्थिक वर्षमा २०७६/७७ मा एक करोड ८९ लाख तथा आव २०७७/७८ मा दुई करोड २४ लाख रुपैयाँ खुद नाफा कमाउने प्रक्षेपण गरेको छ ।

यस्तै, कम्पनीले आव २०७६/७७ मा प्रतिशेयर आम्दानी ५ रुपैयाँ १२ पैसा र आव २०७७/७८ मा ६ रुपैयाँ ४ पैसा पुग्ने प्रक्षेपण छ ।