लक्जेमबर्गका प्रधानमन्त्री जेभियर बेटेलको प्रशासनको मातहतमा यो योजना अगाडि सारिएको हो । बेटेलले आफ्नो चुनावी अभियानमा नै सार्वजनिक यातायात निःशुल्क बनाउने घोषणा गरेका थिए ।
लक्जेमवर्गको राजधानी लक्जेमवर्ग सिटीको यातायात व्यवस्था दुनियाँको सबैभन्दा खराब ट्राफिक व्यवस्था मध्येको एक मानिन्छ । एक लाख १० हजार जनसंख्या रहेको उक्त सहरमा ४ लाख मानिसहरु काम गर्नका लागि जाने गर्दछन् ।
एक शोधका अनुसार लक्जेमवर्ग सिटीमा सन् २०१६ मा जामका क्रममा एउटा ड्राइभरको औसत ३३ घण्टा समय बिताएका थिए । पूरै देशको जनसंख्या ६ लाख रहेको छ । २ लाख छिमेकी देश फ्रान्स, बेल्जियम र जर्मनीबाट सीमा पार गरेर त्यहाँ काम गर्नका लागि जाने गर्दछन् ।
यो पछिल्लो निःशुल्क भाडा योजनालाई नागरिकलाई सार्वजनिक यातायात प्रयोगमा प्रोत्साहित गर्ने महत्वाकांक्षी कदमको रुपमा पनि लिइएको छ ।
त्यहाँको सरकारले २० बर्षसम्मका मानिसहरुका लागि पहिले नै निःशुल्क यातायात सेवा उपलब्ध गराउँदै आएको छ । माध्यमिक तहका बच्चाहरुलाई घरबाट स्कूल आवतजावत गर्नका लागि निःशुल्क बस सेवा सुरु गरिएको छ ।
यति मात्र नभई कुनै पनि व्यक्तिले २ घण्टाभन्दा बढी यात्रा गर्नका लागि १.७८ पाउण्ड अर्थात् करिब २६० रुपैयाँ खर्च गर्नुपर्ने हुन्छ ।
यसका लागि लक्जेमबर्गमा सन् २०२० देखि सबै प्रकारका टिकट बन्द गरिनेछ । यद्यपी निःशुल्क यातायात सुविधाका लागि कस्तो नीति बनाइनेछ भनेर त्यहाँको सरकारले तय गरिनसकेको बताइएको छ । एजेन्सी