अष्ट्रियाका विभिन्न कम्पनीले नेपालका महत्वपूर्ण आयोजनाका काम गरिरहेको भन्दै उनले लगानी नै गर्ने गरी आवश्यक तयारी गर्न समेत राजदूतमार्फत अष्ट्रिया सरकारलाई आग्रह गर्नुभएको उनको सचिवालयले जनाएको छ ।
सो अवसरमा राजदूतले नेपालको ऊर्जा क्षेत्रका लगानी र अनुभव आदानप्रदान गर्न आफ्नो देश इच्छुक रहेको धारणा राखेका थिए । उनले त्यसका लागि नेपाल सरकारलाई औपचारिक रुपमा प्रस्ताव पठाउने तयारी भइरहेको जानकारी दिए ।
यस्तै मन्त्री पुनसँग बुधबार नै अष्ट्रियाको यातायात र प्रविधि मन्त्रालयका आसियान तथा विमस्टेक क्षेत्र हेर्ने क्षेत्रीय निर्देशक मिचेल लिडरेरले समेत भेटवार्ता गरेका छन् । भेटमा निर्देशक मिचेलले ऊर्जा क्षेत्रमा औपचारिक रुपमा काम गर्न चाहेको बताएका थिए ।
उर्जामन्त्री पुनले जलविद्युत्मा अष्ट्रियाको प्रविधि संसारमै चर्चित रहेको भन्दै नेपालमा पनि ती कम्पनीले काम गरिरहेको भन्नेमा आफू जानकार रहेको बताए ।
उनले सरकारले १० वर्षमा १५ हजार मेगावाट बिजुली उत्पादन गर्ने लक्ष्य राखेको जानकारी दिँदै लगानीका लागि उपयुक्त वातावरणसमेत तयार भएको जानकारी गराएका थिए ।