मंसिरको तेस्रो साता बैंकहरुमा ४२ अर्ब रुपैयाँ निक्षेप थपिएको छ । मंसिर १४ गतेसम्म बैंकहरुमा २५ खर्ब ६५ अर्ब निक्षेप रहेकोमा मंसिर २१ सम्म २६ खर्ब ७ अर्ब पुगेको छ । सरकारले स्थानीय निकायको बजेट बैंकहरुलाई चलाउन दिएपछि बैंकहरुको निक्षेपमा सुधार देखिएको हो । यसअवधिमा बैंकहरुको कर्जा भने सात अर्बले बढेको छ ।
अहिले बैंकहरुबीच निक्षेप तान्न मुद्धति बचतको ब्याजदर बढाउने प्रतिस्पर्धा चलेको छ । केही बैंकहरुले यस्तो ब्याजदर १३ प्रतिशत पुर्याइसकेका छन् । धेरैजसो बैंकहरुले १२ देखि साढे १२ प्रतिशत ब्याजदरमा निक्षेप तानिरहेका छन् । आर्कषक ब्याजदर दिएपनि बैंकहरुको निक्षेपमा भने उल्लेखीय सुधार देखिदैन् । मंसिर महिनामा सरकारी पैसा पाएकाले बैंकहरुको निक्षेपमा सुधार देखिएको हो।
सरकारले स्थानीय निकायहरुको बजेट बैंकहरुको निक्षेपमा गणना गर्न दिदा यसबाट मात्रै बैंकहरुमा ३७ अर्ब निक्षेप बढेको हो । सरकारी पैसा गणना नगर्दा मंसिरको तेस्रो साता बैंकहरुको निक्षेप ५ अर्बले मात्र बढेको देखिन्छ। जबकी कर्जा लगानी सात अर्बले बढेको छ ।
लगानी योग्य रकमको अभाव खेपिरहेको बताउदै आएका बैंकहरुले कर्जा विस्तारमा केही संयमता अपनाएका छन् । मंसिर सुरु भए यता बैंकहरुमा ४१ अर्ब निक्षेप थपिएको छ भने उनीहरुले २० अर्ब कर्जा विस्तार गरेका छन् । मंसिरको तेस्रो सातासम्म बैंकहरुमा २६ खर्ब ७ अर्ब निक्षेप छ भने उनीहरुले २३ खर्ब ३ अर्ब कर्जा परिचालन गरेका छन् ।
चालु आर्थिकबर्ष सुरु भए यता बैकहरुमा १३७ अर्ब निक्षेप थपिएको छ । यस अवधिमा बैंकहरुको कर्जा १९२ अर्बले बढेको छ । गत असारको अन्तयसम्म बैंकहरुमा २४ खर्ब ७० अर्ब निक्षेप थियो भने त्यसअवधिमा बैंकहरुले २१ खर्ब ११ अर्ब कर्जा लगानी गरेका थिए ।
