शेयर बजार सुधारका लागि अध्ययन गर्न गठित कार्यदलले बुझाएको सुझाबहरु कार्यान्वयनमा आउने अपेक्षा बढ्दा शेयरबजारमा सुधार देखिएको छ । कार्यदलले सरोकारवालाहरुसँग सुझाब संकलन गरेर अन्तिम प्रतिवेदन तयार गर्दैछ ।

गत साता अर्थमन्त्रीले मुद्रा तथा शेयर बजारका समस्या र समाधानका उपाय खोज गर्न अध्ययन समिति गठन गरेयता शेयर बजारमा क्रमश सुधार देखिएको छ ।अध्ययन समितिले बजारलाई पूँजी बजारको बिकासका र विस्तारका लागि तत्काल सरकारले चाल्नु पर्ने कदमको विषयलाई समेटेर आइतबार प्रतिवेदन बुझाउँदै छ।

जसमा लगानीकर्ताहरुले बर्षैदेखि उठाउदै आएका मार्जिन ल्यान्डिङ् र ब्याजदरको विषयलाई प्राथमिकतामा राखिएको छ । साथै आन्दोलनरत लगानीकर्ताले उठाएका मागहरुलाई पनि कार्यदलले आफ्नो सुझाबमा समेटेको छ । तत्काल सबै माग पुरा नभएपनि लगानीकर्ताले उठाएका अधिकांश समस्या सम्बोधन हुने अपेक्षाले बजार बढेको हो ।

संसदको अर्थ समितिमा समेत पूर्वअर्थमन्त्रीहरु लगायत सरोकारवालाहरुले शेयर बजार बिषय उठाएपछि सरकारलाई सम्बोधन गर्नुपर्ने दबाब परेको छ । त्यस्तै बैंकहरुले अनौपचारिक रुपमा ब्याजदर नबढाउने सहमति गरेका खबरहरुले पनि लगानीकर्ताको मनोबल बढेको देखिन्छ ।

विहीबार नेप्से सूचक ७.६० अंकले बढेर ११४८.७८ बिन्दुमा पुगेको छ । यसदिन बुधबारको तुलनामा कारोबार रकम समेत सुधार भएको छ । बुधबार २६ करोड ८८ लाख रुपैयाँ बराबरको कारोबार भएको बजारमा आज भने ५ करोड ४९ लाख रुपैयाँले बढेर ३२ करोड ३७ लाख रुपैयाँ बराबरको कारोबार भयो । बिहिबार १५४ कम्पनीको ९ लाख ९७ हजार ६७२ कित्ता शेयर किनेबेच भए ।
’क’ वर्गको कम्पनीको कारोबार मापन गर्ने सेन्सेटिभ इन्डेक्स् १.६४ अंकले बढेर २४४.७० विन्दुमा उक्लेको छ ।
'कारोबारमा आएका १० उपसूचकमध्ये होटल, फाइनान्स र अन्य समुह बहेक सबै सुचक सकारात्मक छन् । सबै भन्दा धेरै निर्जीवन बीमा कम्पनीको ६५.७८ अंकले बढेको छ । यस्तै जीवन बीमा ३०.२७, माइक्रोफाइनान्स ११.६१ अंकले सकारात्मक भएको हो ।

यता सबै भन्दा धेरै अन्य समुह २.५७ अंकले नकारात्मक भए । होटल १.८५, फाइनान्स ०.४४ अंकले घटेको हो ।  यस दिन नेपाल इन्स्योरेन्सको शेयर सबैभन्दा धेरै कारोबार भएको छ । कम्पनीको ५ करोड २५ लाखको कारोबार भएको छ । त्यसैगरि नेपाल बैंक २ करोड २६ लाख, माछापुच्छ्रे बैंकको संस्थापक शेयर २ करोड ३ लाख, छिमेक लघुवित्तको १ करोड ८५ लाख, एनएमबि बैंक एक करोड ६५ लाख, इन्भेष्टमेन्ट बैंक एक करोड ३१ लाख, एनआईसि एशिया बैंकको १ करोड १६ लाख रुपैयाँ बराबरको कारोबार भयो ।

बिहिबारको बजारमा नागबेली लघुवित्तको शेयरमुल्य ५.२५ र लक्ष्मी लघुवित्तको ५.१५ प्रतिशतले उकालो लागेको छ । यस्तै रैराङ्ग हाइड्रोवापर र काभेली विकास बैंकका शेयरधनीहरुले ४ प्रतिशत भन्दा बढिले कमाएका छन् ।

यस दिन सबै भन्दा धेरै सुर्याेदय लघुवित्तको शेयरमूल्य ३.५७ प्रतिशतले घटेको छ । यस्तै सेन्ट्रल फाइनान्स, पन्चकन्या माईको शेयरधनीहरुले ३ प्रतिशत भन्दा बढीले गुमाएका छन् ।