नेपाल बैंकर्स संघले व्यक्तिगत निक्षेपमा ब्याजदर बैंकले आफैँ निर्धारण गर्न पाउने निर्णय गरेपछि बैंकहरुले १३ प्रतिशतसम्म ब्याज दिन थालेका छन् ।
जसले गर्दा दश प्रतिशत ब्याजदरका ऋणपत्रहरु बिक्री गर्न बैंकहरुलाई कठिनाई उत्पन्न भएको छ । बैंकहरुले सामान्य बचतमै सात प्रतिशत ब्याज दिइरहेका छन् ।
सानिमा बैंकले कात्तिक ३० गतेदेखि निष्काशन गरेको दश वर्ष अवधिको ‘१० प्रतिशत सानिमा डिबेन्चर–२०८५’ मा मंसिर २८ गते सम्ममा १२ करोड रुपैयाँ बराबरको मात्रै आबेदन परेको छ । शुक्रबार सम्ममा २ हजार ५१८ जनाले एक लाख २० हजार कित्ताको लागि आबेदन परेको बैंकको ऋणपत्र बिक्री प्रबन्धक काठमाडौं क्यापिटल मार्केटका मर्चेन्ट बैंकिङ्गले जनाएको छ ।
निर्धारित समय भित्र बैंकको सबै ३८ करोड रुपैयाँको ३ लाख ८० हजार कित्ता ऋणपत्र बिक्री नहुने देखिन्छ । अन्तिम दिन पुष १ गते केहि बढी आबेदन पर्नसक्ने बिक्री प्रबन्धक कम्पनीको अनुमान छ । तरपछि सबै ऋणपत्र नबिक्ने निश्चित छ ।
सर्वसाधारण लगानीकर्ताका लागि छुट्टाइएको ऋणपत्रमध्ये अझै २६ करोड रुपैयाँ बराबरको २ लाख ६० हजार कित्ता बिक्री हुन बाँकी छ ।
सानिमा बैंकले कूल २ अर्ब रुपैयाँको एक हजार रुपैयाँ अंकित दरका २० लाख कित्ता ऋणपत्र बिक्रीमा ल्याएको हो । जसमध्ये ३ लाख ८० हजार कित्तामा सर्वसाधारणलाई, २० हजार कित्ता सामूहिक लगानी कोषलाई र १६ लाख कित्ता व्यक्तिगत तरवबाट बिक्री गरिनेछ ।
सिद्धार्थ बैंकको पनि उस्तै हालत
यस्तै सिद्धार्थ बैंकले साढे दश प्रतिशत ब्याजदरमा दुई अर्ब २५ करोडको ऋणपत्र निष्काशन गरेकोे छ। बैंकले प्रतिकित्ता एक हजार मूल्यमा ७ वर्षे अवधिको “एसबिएल डिवेन्चर २०८२” निष्काशन गरेको हो । जसमा छिटोमा मंसिर २६ गते र ढिलोमा पुस २३ गतेसम्म आवेदन गर्न पाउने व्यवस्था गरिएको छ।
सिद्धार्थको ऋणपत्रमा निक्कै कम आवेदन परेको छ । ऋणपत्रको बिक्री प्रबन्धकमा एनआईबिएल एस क्यापिटल रहेको छ । जसमा न्यूनतम २५ कित्ताको २५ हजारदेखि अधिकतम एक लाखकित्ताको लागि १० करोड रुपैयाँसम्मका आवेदन गर्न सकिने व्यवस्था छ ।
सिद्धार्थ बैंकले प्रतिकित्ता एक हजार रुपैयाँ अंकित मूल्यमा २२ लाख ५० हजार कित्ता ऋणपत्र निष्काशन गरेको हो । निष्काशित ऋणपत्रमध्ये २० प्रतिशत अर्थात ४५ करोड रुपैयाँ सर्वसाधारणका लागि र ८० प्रतिशत अर्थात एक अर्ब ८० करोड रुपैयाँ व्यक्तिगत तबरबाट बिक्री हुनेछ ।
सनराइजको आउने क्रममा
यता सनराइज बैंकले पनि एक अर्ब रुपैयाँको ऋणपत्र जारी गर्ने भएको छ । बैंकले प्रतिकित्ता एक हजार अंकित मूल्यमा १० लाख कित्ता ऋणपत्र निष्काशन गर्न लागेको छ ।
निष्काशन हुन लागेको ऋणपत्र मध्ये २० प्रतिशत अर्थात २० करोड रुपैँया बराबरको २ लाख कित्ता सर्वसाधारणका लागि निष्काशन हुनेछ । ८० प्रतिशत अर्थात ८० करोड रुपैँया बराबरको ८ लाख कित्ता व्यक्तिगत तबरबाट बिक्री गर्न लागेको बैंकले जनाएको छ ।
बैंकको ऋणपत्रमा लगानी गर्ने लगानीकर्ताले बार्षिक दश प्रतिशत ब्याज अर्धबार्षिक रुपमा प्राप्त गर्नेछन् । ऋणपत्रको अवधि ५ बर्षको रहेको छ ।
‘सनराइज डिबेञ्चर २०८०’ नाम दिइएको उक्त ऋणपत्र जारी गर्न सनराइज बैंकले प्रभु क्यापिटल लिमिटेडसँग सम्झौता गरेको छ ।
