आफूहरुले उठाएको १४ बुँदै मागमा सरकारले सम्बोधनको नाममा छलफलमा बोलाएर जालझेल गरेको आरोप लगाउँदै शेयर लगानीकर्ताको दबाब समूहबाट सोमबार ११ बजेदेखि नेप्से कार्यालय अगाडि संयोजक समेत रहेका हरि ढकाल र तिलक कोइराला  आमरण अनशनमा बस्ने भएका छन् ।

सरकारले आफ्ना मागहरू सुनुवाइ गर्नुको साटो वार्ताका नाममा भड्काउने काम गरेकाले बाध्य भएर आमरण अनशन बस्नुपरेको उनीहरुको भनाई छ । आमरण अनशन सँगै हाल जारी रिले अनशनलाई पनि निरन्तरता दिइने दबाब समूहले जनाएको छ ।

शुक्रबार दबाब समूहको वार्ता टोली र सरकारी अध्ययन समितिबीच वार्ता भएपनि शनिबार अध्ययन समितिको बैठकमा सामेल नगराएछि सरकारले षडन्यन्त्रपूर्ण काम गरेको आरोप लगाउँदै सोमबारदेखि समूहले आमरण अनशन सुरु गरेको हो।

आमरण अनसनसँगै उनीहरुले पुस २ गते सोमबारदेखि स्वःस्फूर्त बजार बन्द कार्यक्रम आह्वान गरेको छ । समूहले लगानीकर्तालाई शेयर कारोबार नगर्न आग्रह गर्दै आन्दोलनमा सहयोग गरिदिन आह्वान गरेको छ । 

पूँजी बजार सुधार र विस्तारका लागि मंसिर १४ गते धितोपत्र बोर्डमा १० बुँदै मागपत्र पेश गरेको यो समूह मंसिर २३ गतेदेखि अर्थमन्त्रीको राजीनामाको मुख्य मागसहित १४ बुँदे माग लिएर नेप्से कार्यालय भद्रकाली अगाडि रिले अनसनमा बसेको थियो ।

शुक्रबार १४ बुँदामध्ये १२ बुँदामा सहमति जनाएको सरकारी वार्ता टोलीले शनिबार वार्तामा बोलाई नेपाल राष्ट्र बैंकको मूल गेटबाटै छिर्न नदिएर षड्यन्त्र भएको भन्दै आफुले उठान गरेका मागका सम्बन्धमा कुनै सम्बोधन नभएपछि लगानीकर्ताहरु पुर्व घोषित कार्यक्रम अनुसार आमरण अनसन बस्ने भएका हुन् ।

आफ्ना मागका सम्बन्धमा अर्थमन्त्रालय र सम्बद्ध निकाय गैरजिम्मेवार भएको लगानीकर्ताको आरोप छ । जसका कारण आफुहरु आमरण अनसनमा बस्न बाध्य भएको दवाब समूहले विज्ञप्तिमा उल्लेख गरेको छ ।