बैंकर्स संघका अध्यक्ष ज्ञानेन्द्रप्रसाद ढुंगाना, डेभलपमेण्ट बैंकर्स संघका अध्यक्ष गोविन्दप्रसाद ढकाल, वित्त कम्पनी संघका अध्यक्ष सरोजकाजी तुलाधर लगायतका बैंकरहरु छलफलका लागि राष्ट्र बैंक पुगेका थिए । छलफलमा नियमन विभागका प्रमुख नारायणप्रसाद पौडेल तथा सुपरिवेक्षण विभाग प्रमुख महेश्वरलाल श्रोष्ठले बैंकहरुले अनियन्त्रित रुपमा लगानी बढाएकोतर्फ ध्यानाकर्षण गराएका थिए ।
अधिक लगानी गरेका कारण बैंकहरुले व्याजदर बढाएको भन्दै यसलाई छिटो निराकरण गर्ने विकल्प अघि सार्न बैंकरहरुलाई विभागीय प्रमुखहरुले सुझाव दिएका थिए । बैंकहरुको लगानीको पछिल्लो अवस्थाको तथ्यांक देखाउँदै विभागीय प्रमुखहरुले बैंक तथा वित्तीय संस्थाहरु छाडा भएको भन्दै चेतावनी समेत दिएका थिए ।
छलफलमा बैंक तथा वित्तीय संस्थाका छाता संगठनका अध्यक्षहरुले व्याजदर घटाउने सम्बन्धमा बैंकहरु सकरात्मक रहेको जवाफ दिएका थिए । अहिले उच्च व्याजदर प्रस्ताव गरेका बैंकहरु नै व्याजदर घटाउनु पर्ने सोचमा रहेको जानकारी गराउँदै बैंकरहरुले आफ्नो खुट्टामा आफैंले बञ्चरो हानेको महसुस भएको बताएका थिए ।
आआफ्नो धारणा राख्ने क्रममा राष्ट्र बैंकका विभागीय प्रमुखहरुले वित्तीय बजारमा देखिएको समस्या समाधानमा लाग्न बुँदागत रुपमा भनाईहरु राखेका थिए ।
बैंकरहरुले जवाफमा अहिलेको व्याजदर वृद्धिले आम नागरिकका बिचमा सेन्टिमेण्ट मात्र कायम गरेको भन्दै बेस रेटमा असर पर्ने गरी निक्षेप संकलन नभएको प्रष्टीकरण पनि दिएका थिए ।
बैंकहरुको समस्या बढेको विषय स्वीकार गर्दै व्याजदर घटाउन सकरात्मक भुमिका निर्वाह गर्ने उनीहरुले बताएका थिए । उनीहरुले केही समय अघिसम्म १० प्रतिशतमा रहेको व्याजदर १३ प्रतिशत पुगे पछि यष्सको आकार नबढोस भन्नका लागि रोल व्याक गर्ने जानकारी विभागीय प्रमुखहरुलाई गराएका थिए । यद्यपी त्यसको प्रकृया र कहिलेबाट व्याजदर घट्ने भन्ने बारे बैंकरहरुले खुलाएका छैनन् ।
व्याजदरका कारण उत्पन्न हुने दीर्घकालिन असरका विषयमा कुनै पक्षले ध्यान दिन नसकेको निष्कर्ष बैंकर तथा राष्ट्र बैंकका विभागीय प्रमुखहरुले निकालेका छन् । यद्यपी छलफलले औपचारिक रुपमा कुनै निर्णय भने गरेको छैन ।
