यस सम्वन्धी सम्झौतापत्रमा एक समारोहकाबीच राष्ट्रिय बीमा कम्पनीको तर्फबाट प्रमुख कार्यकारी अधिकृत बीर विक्रम रायमाझी र नेपाल पुनर्बीमा कम्पनीको तर्फबाट प्रमुख कार्यकारी अधिकृत चिरायु भण्डारीले कम्पनीको केन्द्रीय कार्यालय रामशाहपथमा हस्ताक्षर गरेका छन् ।
राष्ट्रिय बीमा कम्पनी र कर्मचारी सञ्चय कोष बीच कोषका सञ्चयकर्ताहरुको औषधोपचार तथा घातक रोगको उपचारको लागि उक्त कम्पनीवाट बीमालेख जारी भईसकेको सन्दर्भमा सो बीमाको पुनर्बीमा समेत गर्नुपर्ने भएकोले सो पुनर्बीमा सम्झौता भएको हो ।
यस सम्झौता पश्चात कम्पनीले जारी गरेको कर्मचारी सञ्चय कोषका ६ लाख संचयकर्ताहरुको वार्षिक एक लाख रुपैयासम्मको औषधोपचार र १० लाख रुपैयाँसम्मको घातक रोगको उपचारको लागि पुनर्बीमा ब्यवस्था स्वदेशमा नै भएको छ ।
राष्ट्रिय बीमा कम्पनी र नेपाल पुनर्बीमा कम्पनी बीच भएको ५० प्रतिशत पुनर्बीमा सम्झौता अनुसार बीमा शुल्क तथा बीमा दाबीमा दुबै कम्पनीको समान सहभागिता हुने भएको छ ।