जेबिल्स फाइनान्स (JEFL) को ९ लाख ९७ हजार कित्ता लिलामीमा शेयरमा आवेदन दिने आज (पुस १७ गते) अन्तिम दिन हो । फाइनान्सले संस्थापक समूहको ६ लाख ६५ हजार ९५५.५० कित्ता र सर्वसाधारणको ३ लाख ३१ हजार ६७२.५० कित्ता गरी ९ लाख ९७ हजार ६२८ कित्ता शेयर पुस १० गते देखि लिलामीमा ल्याएको हो ।
फाइनन्सको संस्थापक न्यूनतम एक हजार कित्ता र सर्वसाधारणतर्फ न्यूनतम १०० कित्ता शेयरको लागि आवेदन गर्नुपर्नेछ । शेयर खरिद गर्ने लगानीकर्ताले प्रतिशेयर एक सय रुपैयाँ भन्दा बढी मूल्य अंकित गरी बोलकबोल गर्न सकिने व्यवस्था छ ।
फाइनान्सको शेयर खरीद गर्न इच्छुकले सनराइज क्यापिटल कमलपोखरी र सनराइज बैंकको शाखा कार्यालय विराटनगर, वीरगञ्ज, बुटवल, पोखरा, नेपालगञ्ज, सुर्खेत र धनगढीको शाखा कार्यालयबाट लिलामी शेयर खरिदको आवेदन बुझाउन सकिनेछ ।
चुक्ता पुँजी ७३ करोड ८२ रुपैयाँ रहेको बैंकको चालु आर्थिक वर्षको पहिलो त्रैमास सम्ममा प्रतिशेयर आम्दानी ६४ पैसा, प्रतिशेयर नेटवर्थ ११३ रुपैयाँ ६४ पैसा छ । फाइनान्सको शेयरमूल्य धितोपत्रको दोस्रो बजारमा पुस १७ गते मंगलबार प्रतिकित्ता ११० रुपैयाँ हाराहारीमा कारोबार भैरहेको छ ।
सेञ्चुरी कमर्सियल बैंक र नयाँ नेपाल लघुवित्तको लिलामी भोलिदेखि खुल्ने
सेञ्चुरी कमर्सियल बैंक र नयाँ नेपाल लघुवित्तको १९ लाख १८ हजार ३७ कित्ता शेयर भोलि पुस १८ गते देखि लिलामी खुल्ला हुनेछ । सेञ्चुरी बैंकको १८ लाख ७० हजार २७४ कित्ता र नयाँ नेपाल लघुवित्तले ४७ हजार ७६३ कित्ता शेयर लिलामीमा आउने भएको हो । दुबै कम्पनीको लिलामी शेयरमा पुस २५ गते सम्ममा बोककलोल गर्न सकिने जनाइएको छ ।
सेञ्चुरी बैंक (CCBL) ले बुधबारदेखि १८ लाख ७० हजार २७४ कित्ता शेयर लिलामी ल्याउने भएको छ । बैंकले संस्थापक समूहको १४ लाख ६१ हजार ९९ कित्ता र सर्वसाधारण समूह तर्फको ४ लाख ९ हजार १७५ कित्ता शेयर लिलामी ल्याउने भएको हो ।
इच्छुक लगानीकर्ताले बोलकबोल मार्फत लिलामी शेयरमा (संस्थापक र साधारण) न्यूनतम १०० कित्ता देखि १० अंकले भाग जाने संख्यामा अधिकतम सबै कित्ताका लागि बोलपत्र पेश गर्न सकिनेछ । लिलामी शेयरमा पुस २५ गतेसम्म आवेदन गर्न सकिने बिक्री प्रबन्धक सिभिल क्यापिटलले जनाएको छ ।
बोलपत्र आवेदन बिक्री प्रबन्धक सिभिल क्यापिटल, सुन्धारा काठमाडौं तथा सेञ्चुरी बैंकका विराटनगर, धरान, वीरगञ्ज, नारायणगढ, पोखरा, बुटवल, नेपालगञ्ज, धनगढी, बिर्तामोड र हेटौंडा शाखाबाट पेश गर्न सकिनेछ ।
बैंकको शेयरमूल्य धितोपत्रको दोस्रो बजारमा मंगलबार प्रतिकित्ता १७२ रुपैयाँ हाराहारीमा कारोबार भैरहेको छ ।
चुक्ता पूँजी ८ अर्ब ६ करोड रुपैयाँ रहेको बैंकले चालु आर्थिक वर्षको पहिलो त्रैमासमा २० करोड रुपैयाँ खुद नाफा कमाएर प्रतिशेयर आम्दानी १३ रुपैयाँ ५९ पैसा कायम गरेको छ ।
नयाँ नेपाल लघुवित्तको लिलामी शेयर सबै संस्थापक
नयाँ नेपाल लघुवित्त वित्तीय संस्था (NNLB) को पनि भोलि देखि संस्थापक समूहको ४७ हजार ७६३ कित्ता शेयर लिलामीमा आउने भएको छ । लघुवित्तले सर्वसाधारणले समेत किन्न पाउने गरी संस्थापक शेयर लिलामी आउने भएको हो ।
यसअघि कम्पनीले मंसिर १३ देखि २० गतेसम्म सर्वसाधारण समूहको १७ हजार २६० कित्ता र संस्थापक समूहको ८६ हजार ९३ कित्ता शेयर लिलामीमा ल्याएको थियो । त्यस समयमा संस्थापक समूहको ४७ हजार ७६३ कित्ता शेयरमा माग नपरेपछि सर्वसाधारणले समेत पाउने गरी लिलामीमा ल्याएको हो ।
इच्छुक लगानीकर्ताले न्युनतम १०० रुपैयाँलाई आधार मानेर बढाबढ मूल्यमा शिलबन्दी बोलपत्र पेश गर्न सक्नेछन् । आवेदन दिँदा तोकिएका प्रकृयाहरु पूरा गरि न्यूनतम एक हजार कित्तादेखि सबै कित्तासम्मको लागि आवेदन गर्न सक्नेछन् ।
लघुवित्तको लिलामी शेयरमा बिक्री पबन्धक एनएमबि क्यापिटल, नागपोखरी काठमाडौं, एनएमबि बैंकको वीरगञ्ज, विराटनगर, पोखरा, नेपालगञ्ज, सुर्खेत, बुटवल र धनगढी शाखाबाट पुस २५ गतेसम्म आवेदन गर्न सकिन्छ ।
लघुवित्तको साधारण शेयरमूल्य धितोपत्रको दोस्रो बजारमा पुस १७ गते मंगलबार प्रतिकित्ता ६३५ रुपैयाँ हाराहारीमा कारोबार भैरहेको छ ।
चुक्ता पुँजी २ करोड ४० लाख रुपैयाँ रहेको लघुवित्तले चालु आर्थिक वर्षको पहिलो त्रैमासमा २१ लाख ९४ हजार रुपैयाँ खुद नाफा कमाएर प्रतिशेयर आम्दानी ३६ रुपैयाँ ५६ पैसा कायम गरेको छ ।