चिलिमेले पुस २७ गते आह्वान गरेको वार्षिक साधारण सभा र लाभांश वितरणका लागि पुस १९ गते बिहीबार बुकक्लोज गरेको हो । यसअनुसार बुधबारसम्म कायम शेयरधनीले मात्र गत आवको नाफाबाट प्रस्तावित २० प्रतिशत बोनस र ५ प्रतिशत नगद लाभांश प्राप्त गर्नेछन् ।
नेप्सेले कम्पनीको २० प्रतिशत बोनसलाई समायोजन गरि प्रतिकित्ता ५६२ रुपैयाँ ५० पैसा समायोजित शेयरमूल्य निर्धारण गरेको हो । नेप्सेमा १८० दिन कारोबार भएको शेयरमूल्यका आधारमा कम्पनीको औसत आधारमूलय प्रतिकित्ता ७३७ रुपैयाँ ७५ पैसा कायम भएको नेप्सेले जनाएको छ ।
चिलिमेको बिहीबार समायोजित शेयरमूल्यलाई आधार मानेर कारोबार खुला भएको हो । समाचार तयार पार्दासम्म कम्पनीकाे शेयरमूल्य समायोजित शेयरमूल्यमा १.१६ प्रतिशतले घटेर ५५६ रूपैयाँमा काराेबार भैरहेकाे छ ।
चिलिमेले पुस २७ त्रिभुवन आर्मी अफिसर्स क्लब, भद्रकाली काठमाडौंमा बिहान ११ बजे साधारण सभा डाकेको छ । हाल ३ अर्ब ९६ करोड ५१ लाख १३ हजार रुपैयाँ चुक्ता पूँजी रहेको कम्पनीको २० प्रतिशत बोनस वितरणपछि ४ अर्ब ७५ करोड ८१ लाख ३५ हजार रुपैयाँ चुक्ता पूँजी पुग्नेछ ।
चालू आवको प्रथम त्रैमास अवधिमा चिलिमेले २६ करोड ७८ लाख ९८ हजार रुपैयाँ खुद नाफा कमाएर प्रतिशेयर आम्दानी २७ रुपैयाँ ३ पैसा कायम गरेको छ ।
