बैंकले पुस ११ गते बुधबारेदेखि ६५ लाख १६ हजार ७९५ कित्ता संस्थापक शेयर र १३ लाख ९४ हजार १९८ कित्ता सर्वसाधारण गरि कूल ७९ लाख १० हजार ९९३ कित्ता शेयरमा बोलपत्र आह्वान गरेको थियो ।
बैंकको लिलामी शेयरको बिक्री प्रबन्धक सनराइज क्यापिटल रहेको छ । शुक्रबार कमलपोखरीस्थित क्यापिटलको कार्यालयमा लिलामीमा आवेदन गर्नेहरुको लर्को देखिएको थियो ।
क्यापिटलका प्रमुख कार्यकारी अधिकृत विजयलाल श्रेष्ठका अनुसार पछिल्ला २ दिनमा लिलामीमा आवेदन गर्नेहरुको चाप बढी देखिएको छ । बैंकको लिलाममा राखिएको संस्थापक तथा साधारण शेयरमा मागभन्दा बढी आवेदन पर्ने सम्भावना रहेको उनले बताए ।
बैंकको लिलामी शेयरका लागि बिक्री प्रबन्धकको कार्यालय कमलपोखरी, र एनसीसी बैंकका विराटनगर, विरगञ्ज, बुटवल, पोखरा, नेपालगञ्ज, सुर्खेत, धनगढी, नारायणगढ, बनेपा, र मुख्य शाखा कार्यालय बागबजारबाट शिलबन्दी बोलपत्र संकलन गरिएको थियो ।
जस अनुसार ५ हजार हाराहारीले बैंकको लिलामी शेयरमा आवेदन गरेको आँकलन गरिएको छ । सबै आवेदनलाई तथ्यांकमा प्रबिष्ट गर्ने काम भैरहेको छ । सबै आवेदनको अन्तिम तथ्यांक शुक्रबार साँझसम्ममा नै आईसक्ने क्यापिटलले जनाएको छ ।
सबैं संकलन केन्द्रबाट आवेदनहरु क्यापिटलको कार्यालयमा आए पछि शेयर बाँडफाँडको मिति निर्धारण हुने क्यापिटलले बताएको छ ।
एनसीसीले गत भदौ ४ देखि असोज २२ गतेसम्म २ः१ अनुपातमा २ करोड ३३ लाख ९५ हजार २९१ कित्ता हकप्रद शेयर निष्काशन गरेको थियो । हकप्रदमा नबिकेको शेयर बैंकले लिलामीमा ल्याएको हो ।
पुस १९ गते बिहीबार अन्तिम पटक एनसीसी बैंकको प्रतिकित्ता शेयर २१३ रूपैयाँमा कारोबार भएको छ ।
