कोषले संस्थापक समूहतर्फ १०१ रुपैयाँका दरले ६५ करोड ८१ लाख ९६ हजार रुपैयाँको र सर्वसाधारण समूहतर्फको शेयरका लागि २६ करोड ६२ लाख ९१ हजार रुपैयाँमा आवेदन दिएको हो । कोष बैंकको संस्थापक र साधारण सबै शेयर ९२ करोड ४४ लाख ८८ हजार रुपैयाँ उठाउन तयार भएको हो ।
एनसीसी बैंकले पुस ११ देखि २० गतेसम्म संस्थापक समूहतर्फ ६५ लाख १६ हजार ७९५ कित्ता र सर्वसाधारण समूहतर्फ १३ लाख ९४ हजार १९८ कित्ता शेयरमा बिक्री प्रबन्धक सनराइज क्यापिटलले बोलपत्र आह्वान गरेको थियो । जसमा संस्थापक समूहतर्फ ११९ वटा र सर्वसाधारणको लागि ४ हजार ९२२ वटा आवेदन परेकाले बोलपत्र खोलिसक्न आइतबार साझैसम्म लाग्ने अनुमान गरिएको छ ।
बिक्री प्रबन्धक सनराइज क्यापिटलका प्रमुख कार्यकारी अधिकृत बिजयलाल श्रेष्ठले संस्थापक समूहतर्फ १०१ रूपैयाँ प्रारम्भिक कटअफ कायम भएकाे र साधारण समूहतर्फ अझै करिब २००० बाेलपत्र खाेल्न बाँकी रहेकाे बताए ।
सरकारले नगारिक लगानी कोषलाई दोस्रो बजारमा स्टक डिलरको रुपमा स्थापित गर्न लागेको समयमा संस्थागत लगानीकर्ता कोषले बैंकले लिलामीमा ल्याएको शेयर उठाउन लागेको हो । दोस्रो बजारबाट खरिद गर्दा मूल्य उच्च हुने भएकाले पनि कोषले लिलामीको शेयरलाई प्राथमिकता दिएको हो ।
पछिल्लो समय पूँजीवृद्धिको सजिलो औजार हकप्रद बन्दा धेरै कम्पनीले हकप्रदमा शेयर बिक्री नभएर लिलाम बढाबढमा दुई तीन पटकसम्म आह्वान गर्दै बिक्री गरिरहनु परेको अवस्था छ ।
कोषले एनसिसी बैंकको सबै शेयर उठाउन चाहनुले बजारमा केही स्थायित्व हुने विश्वास लगानीकर्तामा जागेको छ । पछिल्लो समय कोषले आफ्नो शेयर स्वामित्व विभिन्न कम्पनीमा बढाउँदै लगिरहेको छ।
बिक्री प्रबन्धक सनराइज क्यापिटलका अनुसार संस्थापक शेयरमा न्युनतम १०० रुपैयाँदेखि अधिकतम १४५ रुपैयाँसम्मको आवेदन परेको छ ।
बैंकको साधारण शेयर एक वर्षको अवधिमा अधिकतम ३४० रुपैयाँ र न्युनतम १७२ रुपैयाँ सम्ममा कारोबार भएको छ । पुस २२ गते आइतबार भने नेप्सेमा प्रतिकित्ता २१३ रुपैयाँमा कारोबार भएको छ।
कोषले आवेदन गरेको मूल्यभन्दा बढीमा पनि बोलपत्र पेश भएकाले सबै शेयर कोषले पाउन सम्भावना भने छैन । कोषले मागेको मूल्यभन्दा तल आवेदन गर्ने आवेदकले भने शेयर नपाउने निश्चित भएको छ । हाल बैंकको साधारण तर्फको बोलपत्र खुला गर्ने काम धमाधम भइरहेको छ ।
बैंकले यसअघि भदौ ४ देखि असोज २२ गतेसम्म २ः१ अनुपातमा दुई करोड ३३ लाख ९५ हजार २९१ कित्ता हकप्रद शेयर बिक्रीमा ल्याएको थियो ।
सो समयमा बैंकको आधारभुत शेयरधनीहरु एनबी समूह र निर्मल प्रधान समूहले हकप्रद नभरेपछि एक करोड ५४ लाख ८४ हजार २९० कित्ताका लागि मात्र आवेदन परेको थियो । बाँकी अवितरित शेयर लिलामीमा ल्याइएको हो ।
हाल ४ अर्ब ६८ करोड ५९ लाख २ हजार रुपैयाँ चुक्ता पूँजी रहेको एनसीसी बैंकको लिलामीमा हकप्रद बिक्रीपछि ७ अर्ब २ करोड रुपैयाँ पुग्नेछ भने राष्ट्र बैंकले तोकेको ८ अर्ब पूँजी कायम गर्न बैंकलाई अझै चुक्ता पूँजीको ९८ करोड पूँजी वृद्धि आवश्यक देखिन्छ। यसका लागि कम्पनीले करिबक १४ प्रतिशत बोनस बाँड्नुपर्ने रहेकाले पनि बैंकको लिलामी शेयरमा आकर्षण देखिएको हो ।