पुस २९ गते आइतबार सञ्चालक समितिका अध्यक्ष मोतीलाल दुगडको सभापतित्वमा सम्पन्न सभाले सम्बन्धित नियामक निकायको स्वीकृती लिई बैंक आफैँ वा सहायक कम्पनी स्थापना गरी ब्रोकरेज सम्बन्धि कार्य गर्ने व्यवस्था थप गरि प्रबन्धपत्र संसोधन गर्ने प्रस्ताव पारित गरेको हो ।
यसका लागि संसोधन गरि पारित भएको प्रबन्धपत्र तथा नियमावलीमा नियामक निकायले कुनै फेरबदल गर्न निर्देशन दिएमा सोही बमोजिम गर्न सञ्चालक समितिलाई अख्तियारी समेत प्रदान गरेको छ ।
उक्त साधारण सभाले बैंकको हालको चुक्ता पूँजीको ११.५० प्रतिशतको दरले लाभांश कर लाग्ने भएमा सो सहित ९३ करोड ७५ लाख ४३ हजार ९२२ रुपैयाँ ८७ पैसा वितरण गर्न स्वीकृत गर्ने प्रस्ताव पारित गरेको छ ।
सो सभाबाट संस्थापक समूह ‘क’ तर्फबाट ३ जना सञ्चालक मोतीलाल दुगड, मालचन्द दुगड र ई. बच्छराज तातेड निर्विरोध निर्वाचित भएका छन् । सर्वसाधरण समूह ‘ख’ तर्फबाट ३ जना सञ्चालकहरु शैलेन्द्र गुरागाई, श्रीमती शारदा शर्मा पुडासैनी र दीपक नेपाल निर्वाचित भए ।
साथै सञ्चालक समितिको तर्फबाट मोतीलाल दुगडलाई सवर्सम्मत रुपमा अध्यक्षमा चयन गरेको छ ।