हाइड्रोपावर कम्पनीले प्रतिकित्ता १०० रुपैयाँका दरले ७८ करोड रुपैयाँ बराबरको ७८ लाख कित्ता शेयर निष्काशन गर्ने तयारी गरेको हो । कम्पनीले शेयर निष्काशन तथा बिक्री प्रबन्धकमा ग्लाेबल आइएमई क्यापिटललाई जिम्मेवारी दिएको छ ।
हिमाल दोलखा हाइड्रोले इलामको गोदक गाबिसमा ४.५ मेगावाटको माइखोला साना जलविद्युत आयोजना ७२ करोड ५३ लाख लागतमा सम्पन्न गरेको छ ।
यस्तै, इलाम नगरपालिकामा ८ मेगावाटको माई साना क्यास्केड जलविद्युत परियोजनाको निर्माण अन्तिम चरणमा छ ।
एक अर्ब ३४ करोड ५७ लाख रुपैयाँ लागतमा निमार्ण भएको यस परियोजनाले छिटै व्यवसायिक उत्पादन गर्ने बताइएको छ । दुवै आयोजनाको लागत प्रति मेगावाट १६ करोड देखि १७ कराेड 
बीचमा रहने जनाइएको छ।
गोदक र राँगापानीमा निर्माणाधीन ८ मेगावाट क्षमताको हिमाल दोलखा हाइड्रोपावर (क्यास्केड) निर्माण अन्तिम चरणमा पुगेको प्रबन्ध निर्देशक रूपमणि राजभण्डारीले बताए। आयोजना ४ वर्षअगाडि निर्माण शुरू भएको थियो ।
इलाम राजदुवालीछेउ टप्पुमा इण्टेकमार्फत उक्त क्यानलमा पानी लगाएर राँगापानीमा बनेको विद्युत्गृहमा पुर्याउने तयारी छ। विद्युत्गृहमा मेशिनहरूको जडान गर्ने कार्य अन्तिम चरणमा पुगिसकेको छ। उत्पादित विद्युत्लाई काबेली कोरिडोरअन्तर्गत गोदक सवस्टेशन मार्फत राष्ट्रिय प्रसारणमा जोड्ने तयारी छ।
हिमाल दोलखा क्यास्केड आयोजना निर्माणसँगै इलामको माइखोलामा मात्र हालसम्म ६ ओटा जलविद्युत् आयोजना निर्माण भइसकेका छन्। अपरमाइ २ ओटा, सानीमामाई २ ओटा र हिमाल दोलखा २ ओटासहित ६ ओटा आयोजना माइखोलाको पानीले सञ्चालन हुनेछ । माइमा अन्य २ जलविद्युत आयोजना निर्माणाधीन अवस्थामा छन् ।
