सप्तकोशी डेभलपमेन्ट बैंकको विराटनगरस्थित कर्पोरेट कार्यालयमा नेपाल राष्ट्र बैंकका क्षेत्रीय प्रमुख विनोद आचार्यको उपस्थितिमा सप्तकोशीका अध्यक्ष तारानाथ निरौला र काबेलीका अध्यक्ष गोपाल प्रसाद काफ्लेले सहमति पत्रमा हस्ताक्षर गरेका छन ।
मर्जर सम्बन्धि सम्पुर्ण कार्य गर्नका लागि सप्तकोशी डेभलपमेन्ट बैंकका सञ्चालक बलराम बरालको संयोजकत्वमा ६ सदस्यिय संयुक्त मर्जर समिति गठन गरिएको छ । अन्य सदस्यमा सप्तकोशीका यज्ञप्रसाद शर्मा र डाक्टर अर्जुन बराल तथा काबेली (KEBL) का जनार्दन घिमिरे, गणेशप्रसाद बराल र हेमराज सुवेदी रहनेछन् ।
नेपाल राष्ट्र बैंकले प्रादेशिक स्तरको बैंक हुन १ अर्ब २० करोड चुक्ता पूँजी चाहिने भनी बनाएको नियमअनुसार यस बैंकले हकप्रद र बोनस शेयर मार्फत् पूँजी वृद्धि गर्ने निरौलाले जानकारी दिए।
उक्त अवसरमा मर्जरपछि बन्ने सप्तकोशी डेभलपमेन्ट बैंकको चुक्ता पूँजी ८१ करोड पुग्नेछ । प्रादेशिक स्तरको बैंकका लागि आवश्यक पर्ने थप ३९ करोड पूँजी हकप्रद र बोनस शेयरमार्फत कायम गर्ने बताइएकाे छ ।
२८ वटा शाखा कार्यालय सहित प्रदेश १ को सबैभन्दा ठूलो विकास बैंक हुने र केन्द्रीय कार्यालय धनकुटामा र कर्पोरेट कार्यालय विराटनगरमा राखखिनेछ । मर्जरपछि बैंकले दुई वर्षभित्र प्रदेश नम्बर १ का १४ वटै जिल्ला र सबै स्थानीय तहमा शाखा खोल्ने लक्ष्य लिएको छ।
चालू आवको दोस्रो त्रैमासिक विवरण अनुसार बैंकमा निक्षेप संकलन २ अर्ब ४२ करोड र लगानीमा रहिरहेको कर्जा २ अर्ब २६ करोड तथा निक्षेपकर्ताको संख्या ५८ हजार र कर्जा ग्राहक संख्या ८ हजार रहेको छ । यस्तै संस्थापक शेयरधनी सङ्ख्या ४२२, सर्वसाधारण शेयरधनी सङ्ख्या करिब २८ हजार हुनेछ।
