केही समय ३२६ मा कारोबार भएको कम्पनीको शेयर त्यसपछि ३३२, ३३८ हुँदै ३४२ रुपैयाँमा पुगेर कारोबारमा सर्किट लागेको नेप्सेका फ्लोर सिटमा देखिएको छ । यस समयमम्म कम्पनीको शेयर ९.९७ प्रतिशतले बढेको छ । कम्पनीको शेयर ३४२ रुपैयाँमा खरिद गर्ने संख्या दुई लाख ५० हजार हाराहारीमा रहेको छ भने मार्केट डेप्थमा बिक्री अर्डर खाली देखिन्छ ।
कम्पनीको शेयरमूल्य अझ बढ्ने आशामा बिक्री भन्दा खरिद चाप उच्च देखिन्छ । नेपाल स्टक एक्सचेञ्जमा शेयर सूचीकरण गराएको एक सातामा नै अपर तामाकोशी हाइड्रोपावर नेप्सेमा सूचीकृत कम्पनीहरुमध्ये उच्च बजार पूँजीकरण हुने दश कम्पनीभित्र परिसकेको छ। कारोबार सुरुदेखि नै शेयरमूल्यमा सर्किट ब्रेक लाग्दा उच्च पूँजीकरण हुने कम्पनीमा समेटिएको हो ।
अपर तामाकोशीको नेप्सेमा पुस २९ गते आइतबारदेखि शेयर कारोबार सुरु भएको थियो । कारोबार सुरु भएको दिनमा नै उच्च रेञ्जमा कारोबार भएको यस कम्पनीको शेयर कारोबार सोमबार दश प्रतिशतभन्दा बढी मूल्यमा कारोबार भएकाले कारोबार रद्ध भएको थियो ।
त्यसपछिका दिनमा पनि कम्पनीको शेयरमा सर्र्किट लागेर कारोबार हुँदा अन्तिम दिन बिहीबार ३११ रुपैयाँमा कारोबार बन्द भएको थियो । तामाकोशीको १० करोड ५९ लाख कित्ता शेयर पुस २६ गते बिहीबार नेप्सेमा सूचीकृत भएका होे ।
