सन् २०१९ र २०२० मा चीनियाँ अर्थव्यवस्थाको वृद्धि ६.२ प्रतिशत मात्र रहने अनुमान लगाइएको छ ।
आईएमएफले जनवरीको आफ्नो विश्व अर्थव्यवस्था परिदृश्य अपडेटमा भनेको छ कि, भारत दुनियाँको सबैभन्दा तीव्र गतिमा बढ्दो अर्थव्यवस्था भएको मुलुक हुनेछ । भारतीय अर्थव्यवस्थाले प्रगतिको गति समाउने छ ।
यसको प्रमुख कारण तेलको मूल्यमा कमी तथा मुद्रास्फीति दबाब कम हुनाले मौद्रिक अवस्था नरम हुने रहेको बताइएको छ ।
आईएमएफले सन् २०१९ का लागि विश्व आर्थिक वृद्धि अनुमान घटाएर ३.५ प्रतिशत र २०२० का लागि ३.६ प्रतिशत हुने बताएको छ । विश्वभरका विभिन्न विकसित अर्थव्यवस्थाको अनुमानबाट आईएमएफले आफ्नो अनुमान घटाएको हो ।
आईएमएफले विश्व आर्थिक वृद्धिको तीन महिना पहिलेको अनुमानलाई क्रमशः ०.२ र ०.१ प्रतिशतले घटाएको छ । उसले सन् २०१८ मा विकसित देशको आर्थिक वृद्धि २.३ प्रतिशत रहने अनुमान लगाएको छ ।
रिपोर्टका अनुसार, विकासशील एसियाको २०१८ को आर्थिक वृद्धि ६.५ प्रतिशतबाट घटेर २०१९ मा ६.३ प्रतिशतमा झर्ने छ । २०२० मा उक्त वृद्धि ६.४ प्रतिशत पुग्ने बताइएको छ ।
चीनको आर्थिक वृद्धिदर सन् २०१७ मा ६.९ प्रतिशत थियो, जबकि त्यस बर्ष भारतीय अर्थव्यवस्था ६.७ प्रतिशत थियो । २०१८ मा चीनको आर्थिक वृद्धि ६.६ प्रतिशत रहेको छ । जुन चीनको करिब तीन दशककोसबैभन्दा न्यून वृद्धिदर हो । २०१९, २०२० मा चीनको आर्थिक वृद्धि अझै घट्ने अनुमान लगाइएको छ ।
विश्व दुई ठूला अर्थव्यवस्था भएका मुलुक चीन र अमेरिका बीचको व्यापार युद्ध र निर्यातमा गिरावट चीनियाँ अर्थव्यवस्था खस्कनुको मुख्य कारण मानिएको छ । एजेन्सी