लघुवित्त कम्पनीको शेयर निष्काशन तथा बिक्री प्रबन्धक प्रभु क्यापिटलले शुक्रबार मात्रै करिब साढे ६१ हजार आवेदनबाट करिब २३ लाख ५० हजार कित्ता बराबरको शेयरका लागि २३ करोड ५० लाख रुपैयाँ बराबरको आवेदन परेको जनाएको छ ।
कम्पनीले शुक्रबारदेखि कूल ६ लाख ७४ हजार कित्ता आईपिओ निष्काशन गरेकोमा १० हजार ३७० कित्ता कर्मचारी र ३३ हजार ७०० कित्ता सामूहिक लगानी कोषका इकाईहरुका लागि छुट्टाइएको छ । ६ लाख २९ हजार ९३० कित्ता शेयरका लागि सर्वसाधारणले माघ २२ गते मंगलबारसम्म आवेदन गर्न सक्नेछन् ।
लगानीकर्ताले धितोपत्र बोर्डबाट आश्वा अनुमति प्राप्त सम्पूर्ण बैंक तथा वित्तीय संस्थाबाट ७७ जिल्लाबाटै आईपिओमा आवेदन गर्न सक्नेछन् भने मेरो शेयर प्रयोगकर्ताले उक्त सफ्टवेयर मार्फत माघ २२ गतेसम्म आवेदन गर्न सक्नेछन् ।
लघुवित्तले निष्काशन गर्न लागेको आईपिओलाई केयर रेटिङ्ग नेपालले ‘केयर एनपि आइपिओ ग्रेड ४’ दिएको छ । यसले कम्पनीको वित्तीय अवस्था औषत भन्दा कमजोर रहेको जनाउँछ ।
हाल १४ करोड रुपैयाँ चुक्ता पूँजी रहेको लघुवित्तको आईपिओ जारी गरेपछि २० करोड ७४ लाख रुपैयाँ चुक्ता पूँजी पुग्नेछ । आईपिओ पश्चात कम्पनीको शेयर स्वामित्व संस्थापकतर्फ ६७.५ प्रतिशत र सर्वसाधारणतर्फ ३२.५ प्रतिशत कायम हुनेछ ।
नुवाकोटको ककनीमा केन्द्रीय कार्यालय रहेको लघुवित्तले देशभरका विभिन्न २४ जिल्लामा ४३ ओटा शाखा कार्यालय स्थापना गरी वित्तीय सेवा प्रदान गर्दै आएको छ ।
गत भदौ १७ गते आईपिओ निष्काशन गर्ने अनुमति माग्दै धितोपत्र बोर्डमा आवेदन गरेको लघुवित्तले पुस २९ गते स्वीकृति पाएको थियो । चालु आर्थिक वर्षको पहिलो त्रैमासमा कम्पनीले २६ लाख ७७ हजार रुपैयाँ खुद नाफा कमाएको थियो ।
कम्पनीले चालू आर्थिक वर्षको अन्त्यसम्ममा २ करोड ७५ लाख ६० हजार खुद मुनाफा गर्ने अनुमान गरेको छ । यस्तै आर्थिक वर्ष २०७६/७७ मा ६ कराेड २७ लाख ८२ हजार र आर्थिक वर्ष २०७७/७८ मा ६ कराेड ८१ लाख ३३ हजार खुद नाफा आर्जन गर्ने लघुवित्तकाे प्रक्षेपण छ ।
