मंगलबार सूचना मार्फत शिवम् सिमेन्टले मकवानपुरबासी तथा सर्वसाधारणलाई एकै पटक गरी आगामी फागुन ६ गतेदेखि शेयर निष्काशन गर्ने जनाएको छ ।
शिवमले सर्बसाधारणका लागि प्रति कित्ता ३०० रुपैयाँका दरले ४४ लाख कित्ता र मकवानपुरबासीका लागि प्रतिकित्ता २०० रुपैयाँका दरले ५ लाख ७९ हजार ६ सय ४० कित्ता शेयर निष्काशन गर्ने भएको हो ।
शिवमले प्रतिकित्ता शेयरको अंकित मूल्य एक सय रुपैंयामा २०० रुपैयाँ प्रिमियम थप गरी ३०० रुपैंयाको दरमा सर्वसाधारणलाई शेयर निष्काशन गर्न लागेको हो ।
मकवानपुरबासीलाई भने अंकित मूल्यमा १०० रुपैयाँ प्रिमियम थप गरी २०० रुपैंयाको दरमा शेयर निष्काशन गर्न लागेको हो ।
यस अघि मकवानपुरबासीलाई प्रतिकित्ता ३०० रुपैयाँ र सर्बसाधारणलाई ४०० रुपैयाँमा शेयर बिक्री गर्ने योजना अनुसार शिवम्ले मकवानपुरबासीलाई शेयर निष्काशन गरिसकेको छ ।
तत्कालिन अवस्थामा मकवानपुरबासीलाई ८ लाख ८० हजार कित्ता शेयर निष्काशन गरेकोमा २ लाख २४० कित्ता शेयर मात्र बिक्री भएको थियो । उक्त समयमा ३०० रुपैंयामा शेयर किनेकाहरुलाई शिवम्ले थप १ लाख १२० कित्ता अर्थात ५० प्रतिशत शेयर दिने भएको हो । पहिलो १०० कित्ता शेयर किनेकाहरुले थप ५० कित्ता शेयर पाउने सूचनामा उल्लेख छ ।
पहिलो शेयर किनेका आयोजना प्रभावितलाई थप शेयर उपलब्ध गराए पछि बाँकी ५ लाख ७९ हजार ६ सय ४० कित्ता शेयर मकवानपुरबासीका लागि निष्काशन भएको हो । मकवानपुरबासीले उक्त शेयरमा आवेदन नगरेको खण्डमा सर्वसाधारणलाई नै ३०० रुपैंयाको दरमा उक्त शेयर बिक्री हुनेछ ।
उता सर्वसाधारणका लागि छुट्याइएको ४४ लाख कित्ता शेयर मध्ये सामुहिक लगानी कोषहरुका लागि २ लाख २० हजार कित्ता छुट्याईएकोमा जम्मा ६० हजार कित्ता मात्र बिक्री भएको छ । यो शिर्षकबाट पनि १ लाख ६० हजार कित्ता शेयर सर्वसाधारण्मा नै बिक्री हुने भएको छ ।
संस्थाका कर्मचारीका लागि छुट्याएको २ लाख २० हजार कित्ता तथा सामुहिक लगानी कोषहरुलाई छुट्याइएको २ लाख २० हजार कित्ता शेयर बाहेक सर्वसाधारणमा ३९ लाख ६० हजार कित्ता शेयर निष्काशन हुनु पर्नेमा ४१ लाख २० हजार कित्ता शेयर निष्काशन भएको हो ।
उता मकवानपुरबासीको ५ लाख ७९ हजार ६ सय ४० कित्ता शेयर पनि अपेक्षित रुपमा बिक्री नभएको खण्डमा बिक्री नभएको शेयर सर्वसाधारणमा नै बिक्री हुनेछ ।
सर्वसाधारण तथा मकवानपुरबासीले उक्त शेयरमा कम्तीमा ५० कित्ताका लागि आवेदन दिनुपर्ने छ । मकवानपुरबासीले अधिकतम ५ लाख ७९ हजार ६ सय ४० कित्ताका लागि आवेदन गर्न सक्ने छन् भने सर्वसाधारणले ४४ लाख कित्तासम्मका लागि आवेदन गर्न सक्ने छन् ।