शेयर खुलेको पहिलो दिनमा प्रधानमन्त्री ओलीले दश हजार कित्ताका लागि आवेदन दिएका हुन् । त्यस्तै उनकी धर्मपत्नी राधिका शाक्यले १० हजार, ऊर्जामन्त्री वर्षमान पुनले एक हजार र पूर्वसभामुख ओनसरी घर्तीले दुई हजार कित्ताका लागि आवेदन दिएका छन् ।
प्रधानमन्त्रीले जनताको जलविद्युत कार्यक्रमको उदघाटन गर्दाको दिनमा नै पहिलो आयोजनाको पहिलो आवेदन आफ्नो तर्फबाट गर्ने घोषणा गरेका थिए । ‘नेपालको पानी, जनताको लगानी, हरेक नेपाली विद्युत्को शेयरधनी’ को नारासहित सो कार्यक्रम गत फागुन २ गते उद्घाटन गरिएको थियो ।
सो आईपिओमा आवेदन दिन बुधबार प्रधानमन्त्रीले ग्लोबल आइएमई क्यापिटल र नेपाल डिपी लिमिटेडमा २ वटा डिम्याट खाता खोलेका थिए।
नुवाकोट र रसुवाको सीमानामा निर्माण भइरहेको ३७ मेगावाट क्षमताको माथिल्लो त्रिशुली थ्री बी जलविद्युत् आयोजनामा सर्वसाधारणले हाललाई प्रति शेयर १० रुपैयाँको दरमा अग्रिम शेयर खरिद गर्न सक्ने छन् । बाँकी ९० रुपैयाँ आयोजनाको ७५ प्रतिशत काम सम्पन्न भएपछि बुझाउनु पर्नेछ ।
सर्वसाधारणले प्रतिकित्ता १० रुपैयाँको दरमा न्यूनतम १०० कित्ता र अधिकतम १० हजार कित्तासम्मको लागि आवेदन दिन सक्ने छन्।
कम्पनीले छिटोमा चैत्र १२ गते र पहिलो चरणमा बिक्री नभएमा ढिलोमा बैंशाख ६ गतेसम्म बिक्री खुला गर्ने धितोपत्र निष्काशन तथा बिक्री प्रवन्धक ग्लोबल आइएमई क्यापिटलले जनाएको छ।
सरकारले गत फागुन २ गते विभिन्न १९ वटा आयोजनालाई जनताको जलविद्युत् कार्यक्रममा सूचीकृत गरेको छ । ती आयोजनाको क्षमता ३ हजार ५०० मेगावाट रहेको छ । सेयर प्रमाणपत्र नपाउञ्जेलसम्म लगानी गरेको रकमको व्याज समेत दिने गरी व्यवस्था मिलाइएको छ ।