बिहान झण्डै साढे ८ बजे नै लगानीकर्ताले बोर्डमा गरेको तालाबन्दी १२ बजे प्रहरीले तोडेको थियो । त्यस बेलासम्म आन्दोलित लगानीकर्ताहरुलाई बोर्डका कार्यकारी निर्देशक परिष्ठनाथ पौडेलले वार्तामा आउन आह्वान गरेका थिए ।
बोर्डका तर्फबाट आएको वार्ताको प्रस्तावलाई लगानीकर्ताले बोर्डसँग मात्र वार्ता नगर्ने भन्दै अस्वीकार गरेका थिए । लगानीकर्ताले अर्थ मन्त्रालय, आन्तरिक राजश्व विभाग र धितोपत्र बोर्डका प्रतिनिधिसँग संयुक्त रुपमा मात्र वार्तामा बस्ने अडान लिएका थिए ।
प्रहरी परिचालन गरेर लगानीकर्तालाई तितरबितर पार्न थालिए पछि आन्दोदन केही सुस्त बनेको थियो । यद्यपी आन्दोलनरत लगानीकर्ताले नाराबाजी गर्न छाडेका थिएनन् ।
लगानीकर्ताको आन्दोलनको सुईको पाएका बोर्डका केही कर्मचारी बिहानै बोर्डमा पुगेर कार्यकक्षमा बसेका थिए । लगानीकर्ताहरुले ती कर्मचारीहरुलाई बाहिर आउन नमिल्ने गरी तालाबन्दी गरेका थिए । सोपश्चात प्रहरीले बल प्रयोग गरी ताला तोडेको थियो ।
ताला तोडिए पछि बोर्डका कर्मचारी आफ्नो आफ्नो कार्यकक्षमा पसेका थिए भने लगानीकर्ता आन्दालन स्थलबाट एक पछि अर्को गर्दै पातलिएका थिए । यद्यपी सुरक्षाकर्मीको उपस्थिती भने बाक्लो थियो ।
