जनकपुरमा मुख्य कार्यालय रहेको जानकारी फाईनान्सले लगानीकर्तालाई ७० प्रतिशत बोनस शेयर र ७ प्रतिशत नगद लाभांश दिने प्रस्ताव गरेको छ । १४ करोड ६२ लाख चुक्ता पूँजी रहेको फाईनान्सले गत आर्थिक बर्षमा ८१ लाख रुपैयाँ खुद नाफा गरी प्रति शेयर आम्दानी ५ रुपैयाँ कायम गरेको थियो । । बोनस शेयर जारीपछि फाईनान्सको चुक्ता पूँजी झण्डै २५ करोड पुग्नेछ ।
अघिल्लो आर्थिक बर्षमा निस्क्रिय कर्जाका कारण घाटामा गएको फाईनान्सले खराब कर्जा उठाएर निस्क्रिय कर्जालाई ५ प्रतिशतमा सिमित गरेको छ भने जगेडा कोषमा २६ करोड रुपैयाँ छ । जगेडा कोषबाट बोनस शेयर दिन लागेको कम्पनीले मंसिर २० मा साधारणसभा गर्दैछ ।
त्यस्तै रुरल माईक्रोफाईनान्स डेभलपमेन्ट सेन्टर(आरएमडीसी) ले लगानीकर्तालाई १० प्रतिशत बोनस शेयर र २१.५८ प्रतिशत नगद लाभांश दिने प्रस्ताव गरेको छ । ५२ करोड चुक्ता पूँजी रहेको आरएमडीसीले गत आर्थिक बर्षमा १८ करोड खुद नाफा गरी प्रति शेयर आम्दानी ३५ रुपैयाँ ५५ पैसा कायम गरेको थियो ।
कैलास विकास बैंकले लगानीकर्तालाई गत आर्थिक बर्षमा गरेको खुद नाफाबाट १५ प्रतिशत बोनस शेयर र १० प्रतिशत नगद लाभांश दिने प्रस्ताव गरेको छ ।
७७ करोड रुपैयाँ चुक्ता पूँजी रहेको कैलासले गत आर्थिक बर्षमा २६ करोड ६१ लाख खुद नाफा गरी प्रति शेयर आम्दानी ३४ रुपैयाँ कायम गरेको थियो ।
त्यसैगरी प्रोफेशनल दियालो विकास बैंकले लगानीकर्तालाई १० प्रतिशत बोनस शेयर र ५ प्रतिशत नगद लाभांश दिने प्रस्ताव गरेको छ । २० करोड चुक्ता पूँजी रहेको बैंकले गत आर्थिक बर्षमा २ करोड २० लाख रुपैयाँ खुद नाफा गरी प्रति शेयर आम्दानी ११ रुपैयाँ कायम गरेको थियो ।
साना किसान बिकास बैंकले ५० प्रतिशत हकप्रद शेयर जारी गर्ने र लगानीकर्तालाई १५.७८ प्रतिशत नगद लाभांश दिने प्रस्ताव गरेको छ । साना किसानका हालका शेयरधनीले २ कित्ता शेयर बराबर नयाँ १ कित्ताका लागि आबेदन गर्न पाउने छन् । २३ करोड चुक्ता पूँजी रहेको साना किसानले गत आर्थिक बर्षमा ११ करोड ५० लाख रुपैयाँ खुद नाफा गरी प्रति शेयर आम्दानी ५० रुपैयाँ कायम गरेको थियो । हकप्रद जारी गरेपछि अब चुक्ता पूँजी ३४ करोड नाघ्ने छ ।
त्यस्तै आईसीएफसी बित्तीय संस्थाले लगानीकर्तालाई ५० प्रतिशत हकप्रद शेयर जारी गर्ने प्रस्ताव गरेको छ । लगानीकर्ताले हालको २ कित्ता शेयर बराबर नयाँ १ कित्ता आबेदन गर्न पाउने छन् । मंसिर १६ मा हुने संस्थाको ११ औ साधारणसभा प्रयोजनका लागि कार्तिक ३० गतेदेखि शेयरधनी दर्ता किताव बन्द हुने जनाएको छ । संस्थाको चुक्ता पूँजी हाल ३७ करोड ४३ लाख रहेकोमा हकप्रद जारीपछि ५६ करोड १४ लाख रुपैयाँ पुग्ने छ ।