विक्री प्रबन्धक ग्लोबल आइएमई क्यापिटले निम्नलिखित २३ वाणिज्य बैंक, दुई विकास बैंक, चार फाईनान्स कम्पनीका आईपीओ आवेदकले खातामा नै रकम पाउने जनाएको छ । उल्लेखित बैंक तथा वित्तीय संस्थाबाहेक अन्यमा खाता रहेका आवेदक तथा उपत्यका बाहिरका आवेदकको हकमा आवेदन संकलन बुझाएको स्थानबाट रकम फिर्ता हुने क्यापिटलले जनाएको छ ।
नेपाल क्लियरिङ हाउसको सदस्य रहेका बैंकमा खाता हुने आवेदकले साउन १६ गतेसम्म खातामा रकमान्तर नभए क्यापिटले कार्यालय जमलबाट एकाउन्टपेयी चेकमार्फत फिर्ता गर्ने बताएको छ । आफै उपस्थित हुन नसक्ने आवेदकले आईपीओ भरेको अर्धकट्टीको पछाडी मञ्जुरीनामा साथै आधिकारीक परिचयपत्रका साथ उपस्थित हुन क्यापिटलले सूचना जारी गरेको हो ।
हिमालयनको आईपीओ बाँडफाँड पहिलो पटक धितोपत्र बाँडफाँड निर्देशिका २०७४ बमोजिम भएको हो । जसमा एक लाख २९ हजार ३०२ जनाले १० कित्ता, ३४ हजार ४३० जनाले गोलाप्रथाबाट थप १० कित्ता गरी २० कित्ता र ५ जनाले ११ कित्ता सेयर प्राप्त गरेका थिए । हिमालयन पावरको आइपीओ बाँडफाँड साउन ४ गते भएको हो ।
कम्पनीको २१ लाख ३० हजार ४३० कित्ता सेयरमध्ये कर्मचारी र सामुहिक लगानीकोषलाई छुट्याएर १९ लाख ८१ हजार ६ सय ७५ कित्ता सेयर सर्वसाधारणलाई बाँडफाँड गरिएको हो । साधारण सेयरका लागि कुल एक लाख ६३ हजार ७३७ जनाले सेयर प्राप्त गरेका थिए भने गलत आवेदनका कारण १२ सय ६४ जना आवेदकको आवेदन रद्ध भएको क्यापिटलले जनाएको छ ।
सर्वसाधारणका लागि आइपिओ निष्काशन तथा वितरण पश्चात कम्पनीको चुक्ता पूँजी एक अर्ब ६ करोड पुगेको छ ।
