झापाको बिर्तामोडमा मूख्य कार्यालय रहेको समीट माइक्रोफाइनान्सले साधारण सभा सम्पन्न भएको १० महिनापछि बोनस सेयर नेप्सेमा सूचीकरण गराएको हो ।
लघुवित्तले गत आर्थिक वर्षमा शतप्रतिशत हकप्रद निष्काशन गरेर सबै सेयर सूचीकरण गराईसकेको छ । हकप्रद निष्काशन हुँदै गर्दा साधारण सभाले पारित गरेको बोनस १० महिना बित्दासम्म नेप्सेमा सूचीकरण हुन सकेको थिएन । जसका कारण लगानीकर्ताले लामो समयसम्म समीट माइक्रोको बोनस आफ्नो डिम्याट खातामा देख्न सकेका छैनन् ।
माइक्रोफाइनान्सले अघिल्लो आर्थिक वर्षको कमाईबाट तत्कालीन अवस्थाको ७ करोड २५ लाख रुपैयाँ चुक्ता पूँजीको ३४.४८२ प्रतिशत बोनस वितरण गर्ने प्रस्ताव गरेको थियो ।
गत पुस २८ गते सम्पन्न माइक्रोफाइनान्सको साधारण सभाले उक्त बोनस पारित गरे पनि कात्तिकको पहिलो सातामा आएर मात्र भएको हो । माइक्रोफाइनान्सले शुक्रबार २ लाख ५० हजार कित्ता सेयर सूचीकरण गराएको हो ।
समीट माइक्रोफाइनान्सका प्रमुख कार्यकारी अधिकृत देवेन्द्र बस्नेतले प्रबन्धपत्र तथा नियमावली संसोधनमा धेरै विषय परिमार्जन गर्दा सेयर सूचीकरणमा ढिलाई भएको बताए ।
१ नम्बर प्रदेशका १० जिल्लालाई कार्यक्षेत्र बनाउँदै आएको माइक्रोफाइनान्सले १५ जिल्लामा कार्यक्षेत्र विस्तार गर्ने विषय लम्बिएको उनको भनाई थियो ।
माइक्रोफाइनान्सले गत आर्थिक वर्षको कमाईबाट हाल कायम चुक्ता पूँजी १७ करोडको २३.५३ प्रतिशत बोनस तथा १.२४ प्रतिशत नगद लाभांश वितरण गर्ने प्रस्ताव गरिसकेको छ। उल्लेखित बोनस समेत वितरण भए पश्चात माइक्रोफाइनान्सको चुक्ता पूँजी २१ करोड रुपैयाँ पुग्नेछ ।
उता गण्डकी विकास बैंकले पनि अघिल्लो आर्थिक वर्षको बोनस सेयर शुक्रबार नेप्सेमा सूचीकरण गराएको छ । गत जेठ २५ गतेको साधारण सभाबाट पारित भएको बैंकको १९.३१ प्रतिशत बोनस सेयर साढे ४ महिना पछि सूचीकृत भएको हो ।
नेप्सेका अनुसार गण्डकी विकास बैंकले अघिल्लो आर्थिक वर्षको कमाईबाट वितरण गरेको ४४ लाख ५० हजार ९ सय २२.५० कित्ता सेयर दास्रो बजारमा कारोबारका लागि सूचीकरण गराएको हो ।
बैंकका प्रमुख कार्यकारी अधिकृत रेशम थापाले कर, तथा केही विषयमा भएका सामान्य संसोधनका कारण सेयर सूचीकरणमा केहि दिन ढिलाई भएको बताए ।