लघुवित्तले निष्काशन गरेको ५ लाख ६० हजार ७०० कित्ता आईपिओमा ३०.५० गुणा बढी आवेदन परेको छ ।
एनआईबिएल एस क्यापिटलको प्रारम्भिक तथ्याङ्क अनुसार चौतारी लघुवित्तको आईपिओ धितोपत्र निष्काशन तथा बाँडफाँड निर्देशिका अनुसार एक सय जनामध्ये २० आवेदनकले मात्र प्राप्त गर्ने अवस्था रहेको छ ।
उच्च आवेदनका कारण ८० प्रतिशत आवेदकको हात भने खाली हुनेछ ।
आईपिओ २ लाख ७३ हजार ५०० आवेदन परेको छ । यसमध्ये ५६ हजार ७० जनाले मात्र गोलाप्रथाबाट दश कित्ता शेयर पाउनेछन् भने २ लाख १७ हजार ४३० भन्दा बढी आवेदकले शेयर नपाउने देखिन्छ ।
लघुवित्तको आईपिओमा २ लाख ७३ हजार ५०० आवेदनबाट एक अर्ब ७१ लाख रुपैयाँ बराबरको एक करोड ७१ लाख कित्ता शेयर माग भएको छ ।
लघुवित्तले कूल ६ लाख कित्ता आईपिओ निष्काशन गरेकोमा ९ हजार ३०० कित्ता संस्थाका कर्मचारी र ३० हजार कित्ता सामूहिक लगानी कोषका लागि सुरक्षित गरिएको छ । कर्मचारी र म्युचुअल फण्डलाई छुट्टाएर बाँकी रहेको ५ लाख ६० हजार ७०० कित्ता शेयर सर्वसाधारणमा खुल्ला गरिएको थियो।
लघुवित्तले चालू आर्थिक वर्षको प्रथम त्रैमासमा लघुवित्तले ३७ लाख ४८ हजार रुपैयाँ खुद नाफा आर्जन गरेको छ । उसको जगेडा कोषमा एक करोड २६ लाख रुपैयाँ सञ्चित छ भने खराब कर्जा अनुपात ०.४३ प्रतिशत छ ।
लघुवित्तले आईपिओ निष्काशनका लागि सार्वजनिक गरेको विवरणपत्रमा चालु आर्थिक वर्षमा ३ करोड ७३ लाख, आर्थिक वर्ष २०७६/७७ मा ४ करोड ६८ लाख र आर्थिक वर्ष २०७७/७८ मा ५ करोड ७९ रुपैयाँ खुद नाफा कमाउने प्रक्षेपण गरेको छ ।
चुक्ता पूँजी १२ करोड ६० लाख रुपैयाँ रहेको लघुवित्तको साधारण शेयर निष्काशन पश्चात चुक्ता पूँजी १८ करोड ६० लाख रुपैयाँ पुग्नेछ ।
