खड्काले गैरकानूनी रुपमा आर्जन गरेको एक करोड ६ लाख ४ हजार रुपैयाँ बिभिन्न कम्पनीको शेयर खरिद र विभिन्न ५५ वटाभन्दा बढी बैंक वित्तीय संस्था तथा सहकारीमा जम्मा दुई करोड ७१ लाख ५३ हजार समेत गरी २५ करोड २८ लाख भेट्टिएको अख्तिायारले जनाएको छ ।
त्यसैगरी घरजग्गा खरिदमा ११ करोड ६१ लाख, ऋणको सावाँब्याज भुक्तानीमा ४ करोड २२ लाख रुपैयाँ र व्यक्तिगत रूपमा दिएको सापटी १ करोड २५ लाख ६० हजार र विभिन्न बैंकका एटिएमबाट सुपरमार्केटमा एक करोड ८० लाख १६ हजार रुपैयाँ बराबर खर्च गरेको अख्तियारले फेला पारेको आरोप पत्रमा उल्लेख छ ।
अख्तियारका अनुसार विभिन्न व्यक्ति तथा संस्थालाई दिएको चन्दा तथा सहयोग एक करोड १७ लाख ७५ हजार, छोराछोरीको अध्ययन र सामाजिक व्यवहारमा भएको खर्च २५ लाख, गाडी खरिदमा एक करोड १७ लाख रुपैयाँ खर्च भएको छ ।
खड्काले २०६९ साल चैतदेखि अहिलेसम्म पारिश्रमिकबाट ४० लाख ५७ हजार, जग्गा बिक्रीबाट ५८ लाख ७५ हजार, ऋण सापटीबाट ५ करोड ३३ लाख ३६ हजार, घर भाडाबाट १३ लाख ५६ हजार, जागिरबाट अवकाश हुँदा पाएको आर्थिक सुविधा वापत २९ लाख २२ हजार, पेन्सनबाट १४ लाख ७८ हजार, विप्रेषण आयबाट ८ लाख २६ हजार, गाडी बिक्रीबाट ३५ लाख, छोरा बुहारीको पारिश्रमिकबाट ११ लाख गरी जम्मा ७ करोड ४४ लाख ५६ हजार रुपैयाँका साथै सार्वजनिक सेवामा प्रवेश गरेदेखि २०६९ चैतसम्ममा देखिएको विभिन्न शीर्षकको आय १ करोड २० लाख रुपैयाँसहित ८ करोड ६४ लाख ६९ हजार आर्जन गरेको अख्तियारको अनुसन्धानले देखाएको छ ।
खड्काको स्रोत खुलेको आय ८ करोड ६४ लाख ६९ हजार रुपैयाँ मात्र छ । त्यसैगरी अख्तियारको अनुसन्धानमा पुख्र्यौली घर बाहेक नै ३ वटा घर निर्माण तथा खरिद गरिसकेको समेत भेटिएको छ । दुई वटा घर खरिदका लागि आंशिक भुक्तानी दिइसकेको र काठमाडौं, ललितपुर, भक्तपुर र काभ्रे जिल्लाका विभिन्न स्थानमा ११ कित्ता जग्गा खरिद गरेको पनि अख्तियारले फेला पारेको हो ।
खड्काले आर्जन गरेको गैरकानूनी सम्पत्तिमध्ये अमिता लामा सोदेम्बा र आफ्नी श्रीमती शर्मिला खड्काको नाममा समेत लुकाएको आरोप अख्तियारको छ । अमिता लामा सोदेम्बाको नाममा जम्मा ७ करोड ५४ लाखको सम्पत्ति लुकाएको अख्तियारले फेला पारेको छ ।
खड्काले सिजी डेभलपर्सले निर्माण गरेको हात्तिगौडास्थित सिजी हिल्समा ३ करोड २५ लाखमा घर खरिद गरेका छन । यसैगरी बूढानीलकण्ठमा ४० लाख ११ हजारको ८ आना जग्गा खरीद गरेको पनि भेटिएको छ । ८४ लाख ४६ हजारमा टक्सन गाडीसमेत खरीद गरेका छन् ।
सिजी डेभलपर्सले निर्माण गरेको ३ करोड पाँच लाख रुपैयाँको हाउजिङ खरीद गरेको पनि भेटिएको छ । अमिता लामाको नाममा रहेको एनएमबी बैंक र सिटिजन बैंकको खाताहरूबाट गोपालबहादुर खड्काले नै कारोबार गर्ने गरेकोसमेत भेटिएको छ ।
बुढानिलकण्ठमा रोडशो रियलस्टेट प्रालिले निर्माण गरेको घर खरिद गर्नको लागि बैना बापत ८९ लाख ८९ हजार भुक्तानी दिएको र रोडशोले पत्रसहित यो रकम बराबरको गुड फर पेमेन्ट चेक अख्तियारमा दाखिला गरिदिएको हुँदा उक्त चेकको रकम जफत प्रयोजनका लागि दशीका रुपमा आरोपपत्र साथ अदालतमा पेश भएको छ ।
