यस साता कम्पनीको शेयर सबैभन्दा धेरै ४८ करोड १९ लाख रुपैयाँ बराबरको शेयर कारोबार भएको छ । कम्पनीको १६ लाख ५३ हजार कित्ता शेयर २८ हजार ८७७ पटक किनबेच हुँदा सो रकममा कारोबार भएको हो ।
तामाकोशीको शेयरमा आकर्षण बढेकै कारण समग्र जलविद्युत उपसमूहको कारोबार रकम गत साताको तुलनामा ५६५ प्रतिशतले बढेको छ ।
यस साता जलविूत उपसमूहमा मात्रै ५२ करोड २१ लाख ४० हजार बराबरको शेयर कारोबार भएको छ । गत साता यस समूहमा ७ करोड ८४ लाख ५० हजार बराबरको मात्र कारोबार भएको थियो ।
सातामा भएको कूल कारोबारमा जलविद्युत समूहको हिस्सा ३२ प्रतिशत माथि पुगेको छ। कूल कारोबारमा बैंकिङ्गको हिस्सा २८ प्रतिशत र बाँकी अरू ९ उप समूहहरूको रहेको छ। हालसम्म बैंक तथा वित्तिय संस्थाको कारोबारको दबदबाले अन्य समूहको कारोबारलाई डोमिनेश गर्दै आएको थियो ।
सातामा कूल १८६ कम्पनीका ५५ लाख ४८ हजार ५४० कित्ता शेयर एक अर्ब ६२ करोड ५७ लाख ८०हजार रुपैयाँमा खरिद बिक्री भएका छन् । गत साताको तुलनामा कारोबार रकम १२.२० प्रतिशतले घटेको हो । गत साता १८४ कम्पनीका ५३ लाख ७० हजार ३८० कित्ता शेयर एक अर्ब ८५ करोड २०९ लाख रुपैयाँमा कारोबार भएका थिए ।
माथिल्लो तामाकोशी जलविद्युत आयोजनाको शेयर नेपाल स्टक एक्सचेञ्जमा सूचीकृत भएपछि शेयर बजारको संरचनामै आमूल परिवर्तन देखिएको हो। सूचीकरणको एक सातामा नै कम्पनीके शेयरमूल्यमा देखिएको तिब्र उतार चढावले कम्पनी उत्कृष्ट पूँजीकरण हुने दश कम्पनीबाट भने बाहिरिएको छ ।
तामाकोशीको यस साता २९ अर्ब एक करोड ६६ लाख रुपैयाँ पूँजीकरण रहेको छ । दशौं ठूलो पूँजीकरण हुने एनएमबि बैंकको ३० अर्ब ६८ करोड १९ लाख पूँजीकरण छ भाने नेपाल टेलिकमको सबैभन्दा धेरै एक खर्ब ९ अर्ब ५० करोड रहेको छ ।
विगतको केही साता तामाकोशीको शेयरमूल्य वृद्धि हुँदा समग्र नेप्से परिसूचक नै सकारात्मक बन्न सहयोग पुगेको थियो । यसअघि उच्च पूँजीकरण भएका नेपाल टेलिकम, र बैंकिङ्ग उप समूहले धेरै हदसम्म सूचकलाई ड्राइभ गर्ने गरेको थियो । आठ लाख भन्दा धेरै शेयरधनी भएको यस कम्पनीले बजार विविधिकरण पनि गरेको छ ।