सिद्धान्तका आधारमा हेर्दा लगानीका लागि मूल्य आम्दानी अनुपात २० वा सो भन्दा कम रहेका कम्पनी उपयुक्त मानिन्छ । तर सबैजसो लघुवित्त कम्पनीहरुमा न्यून पूँजी रहँदा शेयरमूल्य उच्च हुने गरेको छ ।
नयाँ नेपाल लघुवित्तले गत आर्थिक वर्षको पुस मसान्तको तुलनामा यस पटक खुद नाफा बढाएको वित्तीय विवरण सार्वजनिक गरेको छ । यद्यपी २५० प्रतिशतले हकप्रद र बोनसबाट चुक्ता पूँजी बढाएको कारण लघुवित्तको प्रतिशेयर आम्दानी भने घटेको छ ।
काभ्रेको धुलिखेलमा मुख्य कार्यालय रहेको लघुवित्तले पुस मसान्तसम्ममा २५ लाख २३ हजार रुपैयाँ खुद नाफा आर्जन गरेको छ । गत आवको यसै अवधिमा लघुवित्तले ८ लाख १६ हजार मात्र खुद नाफा कमाएको थियो । समीक्षा अवधिमा १७ लाख ७ हजार नाफा बढेको हो ।
नाफा बढेपनि उच्च पूँजी वृद्धिले लघुवित्तको प्रतिशेयर आम्दानी भने घटेको छ ।अघिल्लो आर्थिक वर्षमा दोस्रो त्रैमासमा ८ रुपैयाँ १६ पैसा रहेको लघुवित्तको प्रतिशेयर आम्दानी भने ६ रुपैयाँ ३७ पैसामा घटेको छ ।
यस अवधिमा लघुवित्तले २ करोडको चुक्ता पूँजी ५ करोड ९२ लाख २३ हजारले बढाएर ७ करोड ९२ लाख २३ हजार पुर्याएको छ । लघुवित्तको जगेडा कोष भने घटेको छ । गत पुसमा २ करोड ४८ लाख रहेको लघुवित्तको जगेडा कोष २ करोड ३८ लाखमा झरेको हो ।
यस अवधिमा लघुवित्तले दश करोड एक लाख निक्षेप संकलन र ३७ करोड ६० लाख बैंक तथा वित्तीय संस्थाबाट सापटी लिएर ५१ करोड २८ लाख कर्जा लगानी गरको छ । यसबाट एक करोड ४७ लाख खुद ब्याज आम्दानी भएको छ ।
लघुवित्तको प्रतिसेयर नेटवर्थ १३० रुपैयाँ १५ पैसा तथा मूल्य आम्दानी अनुपात २१२.५८ गुणाले बढी छ । खराब कर्जाको अनुपात पनि बढेको छ । गत पुसमा २.८८ रहेको यस्तो अनुपमत २.९३ प्रतिशतमा बढेको हो ।