नेप्सेले बुधबार एक सूचना प्रकाशित गर्दै धितोपत्र बोर्डबाट प्राप्त पत्र र सोही आधारमा मञ्जुश्रीले समेत लेखेको पत्रलाई आधार मानी लामो समयदेखि स्थगित कम्पनीको सूचीकरण फुकुवा गरिएको जनाएको छ ।
धितोपत्र बोर्डले फागुन १० गते नेप्सेलाई मञ्जुश्रीको धितोपत्र सूचीकरण स्थगन फुकुवा गरिदिन पत्र काटेको थियो। सोही पत्र र मञ्जुश्रीले फागुन १३ गते नेप्सेलाई लेखेको पत्रका आधारमा कुनै कारबाही विनानै नेप्सेले सूचीकरण फुकुवा गरेको हो ।
मञ्जुश्रीले शेयर मूल्य प्रभावित गर्नेगरी लाभांश सम्बन्धी सूचनामा खेलेको भन्दै गत मंसिर २६ गते नेप्सेले यसको सूचीकरण स्थगन गरिदिएको थियो ।
फाइनान्सले गत आर्थिक वर्षको नाफाबाट ९ प्रतिशत नगद लाभांश वितरणको घोषणा गरेको थियो । तर यो लाभांश राष्टबैंकबाट अस्वीकृत भएपछि लाभांश दर २.९ प्रतिशतमा झारेको थियो ।
नेप्सेले आम लगानीकर्ताले लाभांश सम्बन्धी सूचना प्रभावकारी रुपमा पाउने अधिकार चुस्त दुरुस्त कायम राख्नका लागि अझ बढी प्रभावकारी व्यवस्था गर्न निर्देशन दिएको छ ।