कागजी प्रणालीबाट परेका आवेदनको तथ्याङ्क संकलन भईनसकेका कारण यो तथ्याङ्कमा अझै परिमार्जन हुन सक्ने सानिमा क्यापिटलले जनाएको छ ।
क्यापिटलका अनुसार बुधबार साँझसम्ममा ३ लाख ३ हजार ४४ जना आवेदकबाट ८३ करोड २७ लाख ६३ हजार रुपैंयाको आवेदन परेको हो । औसतमा हेर्दा एक आवेदकले लघुवित्तको २७.४७ कित्ता शेयर माग गरेको देखिन्छ ।
उल्लेखित तथ्याङ्कका आधारमा हेर्दा पनि ८ प्रतिशत आवेदकले मात्र लघुवित्तको शेयर पाउने छन् भने ९२ प्रतिशतको हात खाली हुने देखिन्छ । आस्वाबाट परेको आवेदन समेत समायोजन भए पछि लघुवित्तको शेयर पाउनेको हिस्सा अझै घटेर नपाउनेको हिस्सा अझै बढ्ने देखिन्छ ।
लघुवित्तले सामूहिक लगानी कोष र कर्मचारीलाई छुट्टाएर सर्वसधारणहरुबाट दुई लाख ५२ हजार कित्ता शेयरमा आवेदन माग गरेको थियो ।
कूल २ लाख ६९ हजार ६३० कित्ता साधारण शेयर निष्काशन गरेकोमा ४ हजार १४८ कित्ता (०.५ प्रतिशत) लघुवित्तका कर्मचारी र सामूहिक लगानी कोषलाई १३ हजार ४८२ (५ प्रतिशत) छुट्टाएको छ ।