कम्पनीले जनताको जलविद्युत कार्यक्रम अन्तर्गत गत चैत ७ देखि ११ गतेसम्म ३५ लाख ९३ हजार ८५० कित्ता साधारण शेयर (आइपीओ) सर्वसाधारणका लागि निष्काशन गरेर चैत १४ गते बिहीबार बाँडफाँड गरेको थियो। कम्पनीको एक लाख ११ हजार १५० कित्ता शेयर भने कर्मचारीहरुका लागि छुट्टाइएको थियो।
जसमा प्रधानमन्त्री सहित एक लाख चार हजार २९२ जनाले २० कित्ताका दरले न्यूनतम २० कित्ता र अधिकतम प्राप्त गर्ने ५० हजार २६७ जनाले ३० कित्ताका दरले शेयर प्राप्त गरेका छन् । आईपिओमा एक लाख ५४ हजार ५५९ वटा आवेदन सदर भएको थियो भने संस्थागत र दोहोरो आवेदन गरेका १९ सहित कूल ६७ आवेदन रद्ध भएको थियो।
नुवाकोट र रसुवामा निर्माणाधीन ३७ मेगावाट क्षमताको माथिल्लो त्रिशुली–३ ‘बी’ जलविद्युत आयोजनाले ‘जनताको जलविद्युत कार्यक्रम’ अन्तर्गत पहिलो कम्पनीको रुपमा शेयर निष्काशन गरेको हो।
पहिलो चरणमा १० प्रतिशत बराबरको ३ करोड ७० लाख ५० हजार रुपैयाँ बराबरको ९३ लाख ७० हजार ५०० कित्ताको लागि मात्र शेयर माग गरिएको हो। बाँकी रकम आयोजनाको भौतिक प्रगति ७५ प्रतिशत पूरा भएपछि दोस्रो चरणमा माग गर्नेछ।
समग्रमा आयोजनाको भौतिक प्रगति २९ प्रतिशत र वित्तीय प्रगति १२ प्रतिशत छ । आयोजना निर्माणको जिम्मेवारी चिनियाँ कम्पनी सिचुवान एन्हे हाइड्रोलिक तथा हाइड्रोइलेक्ट्रिक इञ्जिनीयरिङ्ग कम्पनी मार्फत भइरहेको छ ।
गत वर्षको फागुनदेखि निर्माण थालिएको उक्त अयोजना वि.सं. २०७८ फागुन १७ भित्र सम्पन्न गर्ने लक्ष्य छ। आयोजना निर्माणमा आठ अर्ब २२ करोड ७४ लाख ४१ हजार रुपैयाँ (निर्माण अवधिको ब्याजसमेत) लाग्ने प्रक्षेपण छ।
शेयर निष्काशन गरेको मितिबाट साधारण लगानी फिर्ता हुन ७।९५ वर्ष र डिस्काउन्टेड लगानी फिर्ता हुन ११।८२ वर्ष लाग्ने कम्पनीले जनाएको छ।