नेप्सेका अनुसार फाइनान्सको बोनस पश्चात प्रतिकित्ता १३९ रुपैयाँ ३० पैसामा शेयरमूल्य समायोजन भएको हो । यहि मूल्यलाई आधार मानेर फाइनान्सको बिहीबार कारोबार खुल्नेछ।
नेप्सेमा १८० दिन कारोबार भएको शेयरमूल्यका आधारमा कम्पनीको औसत आधारमूल्य १३९ रुपैयाँ १५ पैसा निर्धारण भएको नेप्सेले जनाएको छ ।
जेबिल्सले बैशाख २० गते शुक्रबार साधारण सभा आह्वान गरेको छ। आर्थिक वर्ष २०७३/७४ को पनि साधारण सभा गर्न बाँकी रहेको फाइनान्सले २०७४/७५ को सहित एकैदिन दुई आर्थिक वर्षको सभा बोलाएको हो ।
सभाले आर्थिक वर्ष २०७३/७४ को मुनाफाबाट शतप्रतिशत हकप्रद पश्चात कायम चुक्ता पूँजी ५७ करोड ७९ लाख १२ हजार ५०० रुपैयाँको ३.५७ प्रतिशत बोनस र आर्थिक वर्ष २०७४/७५ को मुनाफाबाट ४० प्रतिशत हकप्रद पश्चात कायम चुक्ता पूँजी ८० करोड ९० लाख ७७ हजार ५०० को १.२४ प्रतिशत बोनस प्रस्तावलाई अनुमोदन गर्ने विशेष प्रस्ताव रहेको छ ।
दुबै आर्थिक वर्षको बोनस वितरणमा लाग्ने कर प्रयोजनका लागि फाइनान्सले १५ लाख २० हजार ८२२ रूपैयाँ र ५ लाख २८ हजार २९ रूपैयाँ गरि २० लाख ४८ हजार ८५१ रूपैयाँ नगद लाभांश वितरण गर्ने प्रस्तावलाई अनुमोदन गर्नेछ।
यसैगरि नेपाल इन्भेष्टमेन्ट बैंकमा विलय हुन सम्झौतापत्रमा हस्ताक्षर गरिसकेको फाइनान्सले मर्जर तथा एक्वीजिशनमा सम्बन्धिमा थप छलफल गर्ने लगायतका कार्यक्रम रहेका छन् ।
साधारण सभाका लागि फाइनान्सले बैशाख ५ गते बिहीबर शेयरधनी दर्ता किताब बन्द गरेको हो । यसअनुसार बैशाख ४ गतेसम्म कायम रहने शेयरधनीले मात्र उक्त लाभांश पाउनेछन् ।
इन्भेष्टमेन्ट बैंकमा विलय हुने प्रकृयामा जाने भएपछि फागुन २७ गतेदेखि नै फाइनान्सको शेयर कारोबार बन्द छ।
