कम्पनीले सार्वजनिक गरेको वित्तीय विवरण अनुसार, यस वर्षको पहिलो त्रैमासमा हुवावेको आम्दानी ३९ प्रतिशतले बढेको हो ।
जनवरी–मार्च त्रैमासमा हुवावेईले कुल १ खर्ब ७९ अर्ब ७० करोड युआन अर्थात् २६ अर्ब ८१ करोड डलर आम्दानी गरेको छ ।
यस अवधिमा कम्पनीले ५ करोड ९० लाख थान स्मार्टफोन विक्री गरेको छ । तुलनाका लागि योभन्दा अघिको वित्तीय विवरण सार्वजनिक नगरेपनि रिसर्च फर्म स्ट्राटेजी एनालिटिक्सका अनुसार, गत वर्षको पहिलो त्रैमासमा कम्पनीले ३ करोड ९३ लाख थान स्मार्टफोन विक्री गरेको थियो ।
विश्वको सबैभन्दा ठूलो दूरसञ्चार उपकरण निर्माता कम्पनी तथा तेस्रो ठूलो स्मार्टफोन कम्पनीका रुपमा रहेको हुवावेले पहिलोपटक आफ्नो त्रैमासिक वित्तीय विवरण सार्वजनिक गरेको हो । यसअघि भने कम्पनीले अर्धवार्षिक र वार्षिक प्रतिवेदन मात्रै सार्वजनिक गर्दै आएको थियो । हुवावे शेयर बजारमा सूचीकृत छैन ।
मार्चको अन्त्यसम्ममा कम्पनीले मोबाइल सेवा प्रदायकहरुसँग ५जी का लागि ४० ओटा सम्झौतामा हस्ताक्षर गरेको छ । विश्वभर कम्पनीको ५जी उपकरणमा प्रतिबन्ध लगाउन दबाब बढिरहेको भएपनि हुवावेईको वृद्धि जारी रहेको पछिल्लो वित्तीय विवरणले देखाएको छ ।
अमेरिकाले हुवावेको उपकरण जासुसीका लागि प्रयोग हुनसक्ने भन्दै विश्वभर हुवावेका विरुद्ध अभियान नै चलाइरहेको छ । अमेरिकाले आफ्ना सहयोगी देशहरुसँग हुवावेको ५जी नेटवर्कलाई प्रतिबन्ध गराउनका लागि आग्रह गर्दे आएको छ ।
ईरानमाथि लागेको अमेरिकी प्रतिबन्ध तोडेको भन्दै गत वर्ष हुवावेकी उपप्रमुख मेंग वांगझुलाई क्यानडाबाट पक्राउ गरिएको थियो । तर हुवावेले अमेरिकाले लगाएको आरोपको लगातार खण्डन गर्दे आइरहेको छ । एजेन्सी