साधारण सभा प्रयोजनको लागि इन्स्योरेन्सको बुक क्लोज मिति तोकेपछि नेपाल लाइफको दैनिक कारोबार बढ्न थालेको छ ।
सोमबार मात्रै नेपाल लाइफको सबैभन्दा धेरै १४ करोड ६९ लाख रुपैयाँ बराबरको शेयर किनबेच भयो ।
सोमबार नेपाल लाइफको १ हजार ८८ पटक करोबार भएर एक लाख १२ हजार १९१ कित्ता शेयर किनबेच भएको छ ।
इन्स्योरेन्सले साधारण सभा तथा लाभांश प्रयोजनका लागि बैशाख १९ गते बुक क्लोज गर्ने जनाएको छ ।त्यस अनुसार मंगलबार १७ गते सम्म कायम शेयरधनीले मात्रै इन्स्योरेन्सको लाभांश पाउनेछ । वैशाख १८ गते मजदुर दिवसको सार्वजनिक विदाका कारण नेप्से बन्द हुनेछ ।
यस्तै लगानीकर्ता लाभांशको लोभमा लाग्दा इन्स्योरेन्सको शेयरमूल्य निरन्तर बढ्दो छ । सोमबार ४.५३ प्रतिशतले बढेको छ । इन्स्योरेन्सको शेयरमूल्य प्रति कित्ता एक हजार ३१६ रुपैयाँमा अन्तिम कारोबार भएको हो ।
नेपाल लाइफको शेयरमा लगानीकर्ताहरुको भिड लाग्द जीवन बीमा उपसमूहको सूचक समेत सबैभन्दा धेरै १३०.७२ अंकले बढेको छ ।
इन्स्योरेन्सले गत आर्थिक वर्षका नाफाबाट २५ प्रतिशत बोनस तथा २३.५० नगद लाभांश गरि कूल ४८.५ प्रतिशत लाभांश वितरण गर्ने प्रस्ताव पारित गर्न आगामी जेठ ४ गते होटल दियालो वीरगञ्जमा १९ औं वार्षिक साधारण सभा बोलाएको छ ।
