मंगलबार उच्च अदालत पाटनले एनसीसी बैंकका विरुद्ध परेका मुद्धा खारेज गर्दे लाभांश वितरणको बाटो खोलिदिएको थियो । बैंकले आउँदो असारभित्र यस अघि अवरुद्ध भएका साधारणसभा गरेर बोनस सेयर वितरण गर्ने आशमा लगानीकर्ता बैंकको शेयरमा झुम्मिएका हुन ।
बुधबारको बजारमा एनसीसी बैंकको ५ लाख ६२ हजार ७८६ कित्ता शेयर किनबेच भएको छ । यो बैंकको मात्रै १४ करोड ८२ लाख बराबरको शेयर खरिदबिक्री भएको छ । बैंकको कारोबार प्रतिकित्ता २५९ रुपैयाँका दरले खुलेको थियो । कारोबार जारी रहदा बैंकको शेयर मूल्य बढेर प्रतिकिक्ता २७१ रुपैयाँसम्म पुगेको थियो। तर बजार बन्द हुने समयमा घटेर २५९ रुपैयाँ नै कायम भएको छ ।
बैंकले मुद्दाका कारण २० र २१ औं साधारणसभा गर्न सकेको छैन । दुई वर्षको नाफाबाट सेयरधनीलाई दिने लाभांश प्रस्तावसहित लेखापरीक्षण प्रतिवेदन (अडिट रिपोर्ट) स्वीकृतिका लागि नेपाल राष्ट्र बैंकमा बुझाएको छ । केन्द्रीय बैंकले स्वीकृति दिएपछि बैंकले लाभांश वितरण गर्नेछ ।
बैंकले दुई आर्थिक वर्षको बोनस वितरणपछि पुँजी ८ अर्ब रुपैयाँ पुर्याउने लक्ष्य लिएको छ । अहिले बैंकको चुक्तापूँजी ७ अर्ब एक करोड छ ।
न्यूनतम चुक्तापूँजी कायम गर्न पनि बैंकले कम्तिमा १२ प्रतिशत बोनस बाड्नुपर्ने हुन्छ । दुई आर्थिक वर्षको लाभांश वितरण बाँकी रहेको र राष्ट्र यो बैंकलाई नगद बाड्न नदिने भएपछि बैंकले २० प्रतिशत भन्दा बढी बोनस बाड्न सक्ने आँकलन गरिएको छ ।
बैंकले चालू आर्थिक वर्षको तेस्रो त्रैमासिक अवधिसम्ममा एक अर्ब १६ करोड ४० लाख रुपैयाँ खुद नाफा आर्जन गरेको छ भने ८३ करोड ९९ लाख लाभांश क्षमता कायम गरेको छ ।
