ठूला कम्पनीहरुको उच्च कारोबार भएको बजारमा साना कम्पनीहरुको शेयरको माग बढ्न थालेको छ । जसले गर्दा शेयर मूल्य बढ्ने दश कम्पनीको सूचीमा साना कम्पनीहरु अगाडि देखिएका छन् । सोमबारको बजारमा पाँच साना कम्पनीको शेयर मूल्य नौ प्रतिशत भन्दा धेरैले बढेको छ ।
नेप्से परिसूचक गत साताको बिहीबार २.२९ अंक, आइतबार १.८७ अंकले ओरालो लागेको थियो । सोमबार ९.१३ अंकले ओरालो लागेर १३०७.७१ बिन्दुमा झरेको छ । बजार झरेपनि कारोबार रकममा भने कुनै असर देखिएन् ।
यस दिन कारोबारमा आएका १७२ कम्पनीका ३३ लाख ९८ हजार ६८० कित्ता शेयर एक अर्ब २२ करोड ५ लाख रुपैयाँ बराबरमा खरिद बिक्री भयो । आज पनि उच्च कारोबार गर्ने कम्पनीमा शिवम सिमेन्ट र नेपाल बैंक नै अग्रस्थानमा रहेका छन् । शिवमको २५ करोड बढीको कारोबार हुँदा नेपाल बैंकको पनि २३ करोड बढीको शेयर किनबेच भएको छ ।
यसदिन कारोबारमा आएका ११ उपसमूह मध्ये ९ वटा समूहको सूचक ऋणात्मक भएका छन भने दुई उपसमूहको सूचक सकारात्मक भएका छन् ।
सोमबार र्निजीवन बीमा समूहको सूचक सबै भन्दा धेरै अर्थात ११९.२५ अंकले घटेको छ । जीवन बीमा ८५.४४, उत्पादन तथा प्रशोधन ५२.६९, विकास बैंक २०.३५, वित्त १९.९६, लघुवित्त १६.८२, बैंकिङ्ग ७.२७, होटल ४.५८ र म्युचुअल फण्ड उप समूहको सूचक ०.१९ अंकले ओरालो लागेको छ ।
सोमबार शिवम सिमेन्ट र नेपाल बैंकको उच्च कारोबार भएको छ । कारोबार रकमको आधारमा शिवम सिमेन्टको ३ लाख ९९ हजार १७१ कित्ता शेयर २५ करोड २१ लाख रुपैयाँ किनबेच । शेयर संख्याको आधारमा नेपाल बैंकको ६ लाख ७७ हजार ९८७ कित्ता शेयर २३ करोड २१ लाख रुपैयाँमा खरिद बिक्री भएको छ ।
ठूला कम्पनीबाट राम्रो आम्दानी गरे पश्चात लगानीकर्ताहरु साना कम्पनीको शेयरमा तानिएका छन् । यस दिन साना कम्पनीको शेयरमा लगानीकर्ताको चाप बढेको देखिन्छ । जसले गर्दा साना कम्पनीको शेयर मूल्य बढेको छ । सोमबार कर्पोरेट डेभलपमेन्ट बैंक, मल्टिपर्पस फाइनान्स, सिन्धु विकास बैंक, बेष्ट फाइनान्स र सर्पोट माइक्रोफाइनान्सको शेयर मूल्य ९ प्रतिशत भन्दा धेरैले बढेको छ ।
यता पाचथर पावर कम्पनीको सबै भन्दा धेरै अर्थात ७.७६ प्रतिशतले घटेको छ । मिथिला लघुवित्त ७.२५, सिभम् सिमेन्ट ५.४० र रिडि हाइड्रोपावर कम्पनीको शेयर मूल्य ५.५ प्रतिशतले घटेको छ ।
