बैंकले असार १४ गते बिहान ११ बजे कालिकास्थानको अमृतभोग क्याटरिङ्गमा बोलाएको १२ औं वार्षिक साधारण सभामा लाभांशको अलावा बैंकले साधारण सभाबाट सञ्चालक समितिलाई राष्ट्र बैंकबाट इजाजत प्राप्त बैंक तथा वित्तीय संस्था एक आपसमा मर्जर तथा प्राप्ति सम्बन्धी सम्पुर्ण काम गर्ने अख्तियारी दिने भएको हो।
साधारण सभाले गत आव २०७४।७५ को मुनाफाबाट सञ्चालक समितिले प्रस्ताव गरेको १.५० प्रतिशत बोनस शेयर र ८ प्रतिशत नगद लाभांश गरी कूल ९.५० प्रतिशत लाभांश वितरण गर्ने प्रस्ताव अनुमोदन गर्नेछ ।
बैंकले हाल कायम चुक्ता पूँजीको १.५० प्रतिशतले कायम हुन् आउने ३ करोड ७५ लाख ३९ हजार ८ सय ३२ रुैपैयाँ बराबरको बोनस शेयर र ८ प्रतिशतले हुन् आउने २० करोड २ लाख १२ हजार ४४१ रुपियाँ बराबरको नगद लाभांश वितरण गर्ने तयारी गरेको हो । हाल बैंकको चुक्ता पूँजी २ अर्ब ५० करोड २६ लाख रुपैयाँ छ । बोनस वितरणपछि चुक्ता पूँजी २ अर्ब ५४ करोड हाराहारीमा पुग्नेछ ।
कामना विकास बैंक र सेवा विकास बैंक मर्जभई एकिकृत कारोबार गर्दाको दिन भन्दा अघिल्लो दिन अर्थात २०७४ साउन १९ गते सम्म कायम शेयरधनीहरुले प्राप्त गर्ने बोनस तथा नगद लाभांशमा कर नलाग्ने बैंकले जनाएको छ ।
साधारण सभा प्रयोजनको लागि बैंकले जेठ ३१ गते देखि असार १४ गते सम्म बुक क्लोज गर्ने जनाएको छ । त्यस अनुसार जेठ ३० गते सम्म कायम शेयरधनीले लाभांश पाउनेछन् ।
