अल्पकालिन फाइदा लिनेतर्फ लगानीकर्ता अग्रंसर बनेपछि धेरै कम्पनीको शेयरमूल्य घट्ने क्रम जारी छ । अर्कातर्फ ठूला कम्पनीहरुले एक्वायर गर्ने हल्ला चलाइएका केही साना कम्पनीहरुको शेयर मूल्य एकाएक बढाउन थालिएको छ ।
नयाँ बजेटले शेयर लगानीकर्तामा उत्साह जगाउने प्रयास गरेको शेयर लगानीकर्ताका विभिन्न संघमा आवद्ध नेताहरुले प्रतिक्रिया दिएका थिए । तर उनीहरुको आह्वान अनुसार शेयर बजार चल्न सकेन ।
पूँजीगत लाभकर घटाउनदेखि बजार विकास र विस्तारका कार्यक्रम समेत घोषणा हुँदा पनि बजारमा नकारात्मक प्रभाव देखिनुले बजारका वास्तविक लगानीकर्तालाई बजेटले सकारात्मक सन्देश दिन नसकेको देखिन्छ ।
यो साता चार दिन खुलेको बजार चारै दिन ओरालो लागेर कारोबार समेत घटेको छ ।
बजारमा छोटो समयमा नै केही निश्चित कम्पनीहरुको शेयर मूल्यमा देखिएको अस्वभाविक वृद्धि र गिरावटले पनि नयाँ प्रविधिले समेत बजारको चलखेललाई नियन्त्रण गर्न नसकेको बुझिन्छ ।
यो साताको अन्तिम दिन विहीबार शेयर बजार ४.६९ अंकले ओरालो लागेको छ । आइतबार १३.७८, सोमबार १२.८४ अंकले घटेको बजार मंगलबार ३.५६ अंकले ओरालो लागेको थियो । बुधबार सार्वजनिक विदा परेकाले शेयर बजार बन्द रह्यो । विहीबार समेत गरी यो सातामा मात्र शेयर बजार झण्डै ३५ अंक तल झरेर १२८४.५९ अंकमा झरेको छ । यसदिन १७२ कम्पनीको ५८ करोड ८८ लाख बराबरको कारोबार भयो ।
कारोबारमा आएका अधिकांस समूहका सूचक ओरालो लागेका छन् । शिवम सिमेन्टको सबैभन्दा धेरै सात करोड बढीको शेयर किनबेच भयो । चार कम्पनीको शेयर मूल्य नौ प्रतिशत बढीले उकालो लागेको छ ।
यसदिन कर्पोरेट डेभलपमेन्ट, गुडविल फाइनान्स, वल्र्ड मर्चेन्ट तथा कर्णाली विकास बैंकको शेयर मूल्य बढेको छ । ठूला कम्पनीहरुले एक्वायर गर्ने हल्ला चलेपछि केही साना कम्पनीहरुको शेयर मूल्य बढाएर किन्नेहरुको चहलपहल भने बढेको छ ।
पाँचथर पावरको शेयर मूल्य सबैभन्दा धेरै पाँच प्रतिशत बढीले ओरालो लाग्यो ।