बैंकहरुले गत वैशाखको अन्तिम साताबाट कर्जा विस्तारमा संयमता अपनाएका थिए । सो क्रमले जेठको तेस्रो सातासम्म पनि निरन्तरता पाएको छ। जेठ महिनामा मात्रै बैंकहरुमा ३४ अर्ब निक्षेप थपिएको छ । यस अवधिमा बैंकहरुले १२ अर्ब मात्र कर्जा विस्तार गरेका छन् ।
बैंकहरुले कर्जा विस्तारमा लिएको आक्रमक नीति र निक्षेप संकलनमा सुधार नहुँदा सिसिडि रेसियो समेत बढेको थियो । सिसिडि रेसियो तोकिएको सीमा भन्दा माथि पुग्ने भएपछि बैंकहरुले कर्जा विस्तार रोकेका छन् भने निक्षेप संकलनमा जोड दिएका छन् । अधिकाश वाणिज्य बैंकहरुको पूँजी, कर्जा तथा निक्षेप (सिसिडि) अनुपात ८० को हाराहारीमा भएकाले कर्जा दिनका लागि नयाँ निक्षेप आवश्यक हुन्छ ।
केही दिन अघि बैंकहरुमा २७ अर्ब अधिक तरलता र अन्तर बैंक ब्याजदर साढे ७ प्रतिशत थियो।
चालु आर्थिक वर्षको जेठ १७ गतेसम्ममा बैंकहरुले कुल २७ खर्ब ४३ अर्ब निक्षेप संकलन गरी २४ खर्ब ५९ अर्ब रुपैयाँ कर्जा प्रबाह गरेका छन् । चालु आर्थिक वर्ष अर्थात श्रावण यता बैंकहरुमा २७३ अर्ब निक्षेप थपिएको छ भने ३४८ अर्ब कर्जा परिचालन गरेका छन् ।
एघार महिनाको अवधिमा बैंकहरुले निक्षेप संकलन भन्दा ७५ अर्ब रुपैयाँ बढी रकम कर्जा परिचालन गरेका छन् ।