कम्पनी सञ्चालक समितिको जेठ २४ गते सम्पन्न १९२ औं बैठकले आगामी असार १० गते मंगलबार होटल इच्छा सिमरा बारामा विशेष साधारण सभा बोलाएको छ ।
हाल ६४ करोड १५ लाख २० हजार रुपैयाँ चुक्ता पूँजी रहेको प्रुडेन्सियल इन्स्योरेन्सले १० बराबर ६ अनुपातमा ३८ करोड ४९ लाख १२ हजारको हकप्रद जारी गर्ने विशेष प्रस्ताव गरेको छ।
यसैगरि प्रबन्धपत्र तथा नियमावली संसोधन गरि चुक्ता पूँजी वृद्धि गरि एक अर्ब २ करोड ६४ लाख ३२ हजार रुपैयाँ कायम गर्ने तथा आवश्यक संसोधनका लागि सञ्चालक समितिलाई अख्तियारी दिने एजेण्डा छ।
विशेष साधारण सभाका लागि कम्पनीले असार २ गतेदेखि शेयर दाखिला खारेज गर्ने भएकाले असार १ गतेसम्म कायम रहने कम्पनीका शेयरधनीले विशेष साधारण सभामा प्रतिनिधित्व जनाउन पाउनेछन्।
प्रुडेन्सियल इन्स्योरेन्सले चालु आर्थिक वर्षको तेस्रो त्रैमासमा १२ करोड ७२ लाख रुपैयाँ खुद नाफा कमाएर प्रतिशेयर आम्दानी २६ रुपैयाँ ४५ पैसा कायम गरेको छ।
उसले गत आवको चौथौ त्रैमासको अन्त्यसम्ममा १८ करोड १० खुद मुनाफा गरेको भएपनि त्यसबाट लाभांश वितरण नै नगरि शेयरधनीलाई हकप्रदको भारी बोकाएर उल्टै पैसा थुत्न खोज्नु रहस्यमय छ।कम्पनीको जगेडा कोषमा पनि १८ करोड रुपैयाँ सञ्चित छ।
