अहिले बैंकहरुमा २३ अर्ब मात्र लगानीयोग्य रकम रहेको छ । अघिल्ला बर्षहरुमा बैंकहरुमा लगानीयोग्य रकमको चरम अभाव हुँदा १२ अर्ब मात्र अधिक तरलता थियो । बैंकहरुको अन्तरबैंक ब्याजदर भने अहिले घटेर ६.४ प्रतिशतमा झरेको छ । गत साता अन्तरबैंक व्याजदर साढे ७ प्रतिशत माथि पुगेको थियो।
एघार महिनाको अवधिमा बैंकहरुले निक्षेप संकलन भन्दा ७१ अर्ब रुपैयाँ बढी रकम कर्जा परिचालन गरेका छन् ।
बैंकहरुले वैशाख महिनाभर पाँच अर्ब निक्षेप उठाएर २७ अर्ब कर्जा प्रवाह गरेको पाईएको छ । बैंकहरुले जेठ २४ गतेसम्म ४५ अर्ब निक्षेप उठाएका छन भने १९ अर्ब कर्जा परिचालन गरेका छन् । जेठको तेस्रो साता मात्रै ११ अर्ब निक्षेप उठाएका बैंकहरुले ७ अर्ब कर्जा लगानी गरेका छन् ।
सरकारले पूँजीगत खर्चको रकम भुक्तानी दिने क्रम केही बढाएकाले बैंकहरुको निक्षेपमा सुधार देखिएको हो । तर गत वर्षको भन्दा बैंकहरुमा निक्षेप बढ्नेक्रम भने सुस्त छ । आर्थिक वर्षको सकिन एक महिना भन्दा बढी समय रहदा बैंकहरुले कर्जा विस्तारमा संयमित देखिएपनि कर्जा दिने क्रम भने रोकिएको छैन ।
बैंकहरुले कर्जा विस्तारमा लिएको आक्रमक नीति र निक्षेप संकलनमा सुधार नहुँदा सिसिडि रेसियो समेत बढेको थियो । सिसिडि रेसियो तोकिएको सीमा भन्दा माथि पुग्ने भएपछि बैंकहरुले कर्जा विस्तारमा संयम राख्दै निक्षेप संकलनमा जोड दिएका छन् । अधिकाश वाणिज्य बैंकहरुको कर्जा पूँजी निक्षेप (सिसिडि) अनुपात ८० को हाराहारीमा भएकाले कर्जा दिनका लागि नयाँ निक्षेप आवश्यक हुन्छ ।
स्रोतः नेपाल बैंकर्स संघ