असार २२ गते आइतबार बैंकको मुख्य कार्यालयमा नारायणहिटीपथमा भएको सम्झौतामा सिटिजन्स बैंकका सञ्चालक तथा मर्जर तथा प्राप्ति समितिका संयोजक पवित्रकुमार कार्की र सहयोगीका डिल्लीप्रकाश घिमिरेले हस्ताक्षर गरेका हुन्।
प्रारम्भिक समझदारी अनुसार सय बराबर नब्बे शेयर स्वाप रेसियो अनुपात अर्थात सहयोगी विकास बैंकको एक सय कित्ता शेयर बराबर सिटिजन्स बैंकको ९० कित्ता शेयरमा प्राप्ती गर्ने उल्लेख छ। सम्पत्ति तथा दायित्व मूल्याङ्कन (डीडीए) प्रतिवेदन अनुसार वास्तविक शेयर स्वाप रेसियो निर्धारण हुने सहमति छ ।
हाल सिटिजन्स बैंकको ८ अर्ब ३७ करोड र सहयोगी विकास बैंकको ५० करोड ९६ लाख रुपैयाँ चुक्ता पूँजी छ। एकीकृत बैंकको चुक्ता पूँजी ८ अर्ब ८७ करोड पुग्ने जनाइएको छ।
यसैगरि असार २१ गते शनिबार सम्मको तथ्यांकको आधारमा सहयोगीलाई प्राप्तिपछि सिटिजन्स बैंकको निक्षेप ७५ अर्ब ६८ करोड र कर्जा लगानी ६८ अर्ब ४७ करोड रुपैयाँ पुग्ने जानकारी दिइएको छ ।
नेपाल राष्ट्र बैंकबाट 'क' वर्गको इजाजत प्राप्त राष्ट्रिय स्तर कार्यक्षेत्र रहेको सिटिजन्स बैंकले 'ख' वर्गको इजाजत प्राप्त तीन जिल्लाहरु धनुषा, महोत्तरी र सिन्धुली जिल्लामा १४ शाखा सञ्चालनमा रहेको सहयोगी विकास बैंकलाई प्राप्ती गर्न लागेको हो। सहयोगि प्राप्ती पश्चात सो तीन जिल्लामा सिटिजन्स बैंकको ९ शाखाहरू सहित २३ शाखा पुग्ने भएको छ।
‘योर पार्टनरफर प्रोग्रेस’ भन्ने नारालाई आत्मसात गरि बैंकिङ सेवा प्रवाह गर्दै आइरहेको सिटिजन्स बैंकको सहयोगी विकास बैंक प्राप्ती पश्चात कूल ९५ वटा शाखा, ८० वटा एटीएम र १०० वटा शाखा रहित बैंकिङ एकाईहरुबाट करिब पाँच लाख ग्राहकवर्गलाई बैंकिङ सेवाहरु प्रदान गर्ने बताइएको छ।
