प्रभु क्यापिटलको प्रारम्भिक तथ्याङ्क अनुसार मंगलबार साँझ सम्ममा २ लाख ९१ हजार आवेदनबाट ४९ लाख ७८ हजार कित्ता अर्थात ४९ करोड ७८ लाख रुपैयाँ बराबरको शेयर माग भएको छ।
यो सर्वसार्धरणलाई निष्काशनमा ल्याएको एक लाख २४ हजार ५९० कित्ता शेयरको ४० गुणा बढी हो । उच्च आवेदन परेपनि लघुवित्तको आईपीओ १२ हजार ४५९ जना आवेदकले मात्रै गोलाप्रथाबाट १० कित्ता शेयर पाउनेछन् ।
कम्पनीले असार २० गते शुक्रबारदेखि जारी पूँजीको ४८ प्रतिशत बराबरको आईपीओ निष्काशन गरेको हो ।
लघुवित्त कम्पनील प्रतिकित्ता एक सय रुपैयाँ अंकित दरमा एक करोड ३२ लाख ६० हजार रुपैयाँ बराबरको एक लाख ३२ हजार ६०० कित्ता शेयर बिक्रीमा ल्याएको हो ।
कूल निष्काशित आईपीओ मध्ये एक हजार ३८० कित्ता शेयर लघुवित्तका कर्मचारीलाई र ६ हजार ६३० सामुहिक लगानी कोषहरुलाई सुरक्षित गरिएको छ भने एक लाख २४ हजार ५९० कित्ता शेयर सर्वसाधारणको लागि बिक्री खुला गरिएको थियो।
घोडाघोडीको अधिकृत पूँजी १० करोड, जारी पूँजी २ करोड १२ लाख ५० हजार र चुक्ता पूँजी एक करोड १० लाख ५० हजार छ । कञ्चनपुरमा केन्द्रीय कार्यालय भई कैलाली र कञ्चनपुर जिल्लाका ६ वटा शाखाबाट कारोबार गर्दै आएको छ।