कम्पनीको साउन ६ गते बसेको सञ्चालक समितिको बैठकले हकप्रद निष्काशनको लागि साउन १४ गते १ दिन बुकक्लोज गर्ने निर्णय गरेको हो। यसअनुसार साउन १३ गतेसम्म कम्पनीको शेयर खरिद गरी शेयरधनी कायम रहने लगानीकर्ताहरुले मात्रै कम्पनीको हकप्रद भर्न पाउनेछन्।
बीमा समितिले तोकेको न्यूनतम चुक्ता पूँजी कायम गनुपर्ने बाध्यतामा रहेको कम्पनीले शेयरधनीलाई हकप्रद २४० प्रतिशत हकप्रद शेयर बिक्री गरेर कायम गर्ने भएको हो। बीमा समितिले निर्जीवन बीमा कम्पनीहरुलाई न्यूनतम एक अर्ब रुपैयाँ चुक्ता पूँजी कायम गर्न निर्देशन दिएको थियो।
कम्पनीले एक सय रूपैयाँ अंकित दरमा १० बराबर २४ कित्ताको अनुपातमा ७२ करोड ५७ लाख ६० हजार रूपैयाँ बराबरको ७२ लाख ५७ हजार ६०० कित्ता हकप्रद जारी गर्नेछ।
कम्पनीले जारी गर्ने हकप्रदलाई केयर रेटिङ्गस् नेपालले ‘केयर एनपि आईपिओ ग्रेड ४’ रेटिङ्ग प्रदान गरेको छ। ग्रेड ४ रेटिङ्गले कम्पनीको आधारभुत पक्ष औसत भन्दा तल आधार रहेको जनाउँछ।
कम्पनीले हकप्रद शेयर निष्काशनको लागि धितोपत्र बोर्डबाट गत असार ८ गते स्वीकृती पाइसकेको छ । हाल ३० करोड २४ लाख रुपैयाँ चुक्ता पूँजी रहेको यस इन्स्योरेन्सको हकप्रद पश्चात एक अर्ब दुई करोड ८१ लाख ६० हजार रुपैयाँ पुग्नेछ।
हकप्रद कम्पनीले विद्यमान शेयरधनीलाई नै बिक्री गर्ने हुनाले हकप्रदको लोभमा महङ्गो मूल्यमा शेयर खरिद फाइदाजनक नहुन सक्छ। लगानीकर्ताले कम्पनीको व्यवस्थापन, समग्र वित्तीय अवस्थाको विश्लेषण गरी गरिएको लगानीबाट मात्रै उचित प्रतिफल प्राप्त गर्न सकिन्छ।
