शाइनले नेपाल राष्ट्र बैंकबाट असोज ९ गते र कम्पनी रजिष्ट्रारको कार्यालयबाट असोज १६ गते पूर्णिमा र भार्गवलाई प्राप्ति गरि एकीकृत कारोबार थाल्न अनुमति प्राप्त गरेको थियो।
रुपन्देहीको बुटवलमा केन्द्रीय कार्यालय रहि १० जिल्ला कार्यक्षत्र रहेको शाइन रेसुङ्गा डेभलपमेण्ट बैंकले ३ जिल्ला कार्यक्षेत्र रहेको पूर्णिमा विकास बैंक र पाँच भार्गव विकास बैंकलाई गाभेको हो।
दुई विकास बैंकलाई गाभेपछि शाइन रेसुङ्गाको शाखा सञ्जाल ७१ पुगेको छ भने चुक्ता पूँजी २ अर्व ६४ करोड पुगेको छ। बैंकको केन्द्रीय कार्यालय रुपन्देहीको बुटवल उप महानगर पालिका ६ मा रहनेछ ।
शाइन रेसुङ्गा डेभलपमेण्ट बैंकको सञ्चालक समितिको अध्यक्षमा राजेन्द्र प्रसाद श्रेष्ठ रहेका छन् भने संस्थापक संचालकहरुमा थानेश्वर पौडेल, डा. तारा प्रसाद उपाध्याय, ई. सुरज उप्रेती र सर्वसाधारण समुहको तर्फबाट सञ्चालक समितिमा मोहन चापागाई र सुदर्शन गौतम रहेका छन् ।
एक्वीजिसनपश्चात बैंकको निक्षेप परिचालन २६ अर्ब ८७ करोड, कर्जा लगानी २३ अर्ब ८१ करोड, ग्राहक संख्या ३ लाख ७७ हजार र कर्मचारी संख्या ५४५ पुगेको छ।
बैंकले एक्वीजिसन पश्चात कायम हुने पूँजीको २५ प्रतिशत हकप्रद शेयर निष्काशन गर्ने तयारी गरेको छ भने दुई विकास बैंकहरूलाई प्राप्ति गरेपश्चात राष्ट्र बैंकबाट अनुमति लिएर राष्ट्रिय स्तरमा कार्यक्षेत्र विस्तार गर्ने योजना बनाएको छ।
