यसअनुसार योजना खारेजीमा गएसँगै असोज ३० गते बिहीबार नेप्सेमा कारोबार भई कायम रहने इकाईधनीले मात्र सो योजनाको प्रतिफल पाउने योजना ब्यवस्थापक एनएमबि क्यापिटलले जनाएको छ।
एनएमबि म्युचुअल फण्ड अन्तर्गत सञ्चालित यो फण्ड आगामी कार्तिक २ गते परिपक्क हुँदै छ। सामुहिक लगानी कोष नियमावली २०६७ को नियम ३१ खण्ड क मा भएको व्यवस्था बमोजिम अनुसार योजनाको अवधि समाप्त भएपश्चात खारेजी प्रक्रियामा लगिने भएको हो। जसका लागि कम्पनीले उपनियम ६ बमोजिम धितोपत्र बोर्डबाट असोज ६ गते योजना खारेजीमा लैजान अनुमति पाइसकेको छ ।
यससँगै नियम ३२ का उपनियम ३ बमोजिम योजना अन्तर्गतको सम्पत्तिलाई नगदमा परिणत गरि इकाईधनीलाई स्वामित्वको आधारमा भुक्तानी दिइने फण्डको व्यवस्थापकले जनाएको छ। रकम फिर्ताबारेको सूचना पछि सार्वजनिक सूचना मार्फत दिइने एनएमबि क्यापिटल ले जनाएको छ।