आइतबार एक सूचना मार्फत बैंकको असोज ३० गते सम्पन्न २५ औं वार्षिक साधारण सभाबाट पारित भएको ११ प्रतिशत नगद लाभांश नेपाल क्लियरिङ्ग हाउसको आईपिएस प्रणाली मार्फत सम्बन्धित शेयरधनीको बैंक खातामा जम्मा गरिने व्यवस्था मिलाएको जनाएको छ ।
बैंकको शेयर रजिष्ट्रार बिओके क्यापिटल मार्फत साधारण सभाका लागि बुकक्लोज गरिएको अघिल्लो दिन (असोज १५ गते) सम्म हितग्राही खातामा बैंक खाता अद्यावधिक गराएका शेयरधनीलाई उनीहरुकै बैंक खातामा नगद लाभांश जम्मा गरिने जनाइएको छ ।
साथै हालसम्म कागजी शेयर धारण गरेका शेयरधनीलाई आफ्नो शेयर डिम्याट गरि हितग्राही खातामा बैंक खाता अद्यावधिक गराएपछि क्रमशः नगद लाभांश जम्मा हुने बताइएको छ ।
शेयरधनीले आफ्नो बैंक खाता रहेको जुनसुकै बैंक तथा वित्तीय संस्था वा सिडिएस एण्ड क्लियरिङ्गबाट निक्षेप सदस्य लिएका कुनैपनि निक्षेप सदस्यहरु मार्फत डिम्याट खाता खोली शेयर अभौतिकिकरण गर्न सक्नेछन्।
शेयर धितो राखेर कर्जा लिएको शेयरधनीले भने सम्बन्धित बैंक तथा वित्तीय संस्थाबाट नो अब्जेक्सन लेटर उपलब्ध गराएपछि नगद लाभांश पठाइने उल्लेख छ।
बैंक अफ काठमान्डूको असोज ३० गते सम्पन्न २५ औं वार्षिक साधारण सभाबाट ११ प्रतिशत नगद र ६ प्रतिशत बोनस शेयर अनुमोदन भएको थियो।