विश्व अर्थव्यवस्थामा देखिएको मन्दी र शेयर बजारमा दखिएको अस्थिरताका कारण अर्बपतिहरुको सम्पत्तिमा उच्च गिरावट देखिएको बताइएको छ ।
स्वीट्जरल्यान्डको मल्टीनेशनल इन्भेष्टमेन्ट बैंक यूबीएस र प्रोफशनल सिर्भसेज फर्म पीडब्ल्यूसीले सार्वजनिक गरेको प्रतिवेदनमा उक्त कुराको खुलासा गरिएको हो ।
अमेरिका–चीनका बीच जारी व्यापार युद्धबाट चीनसमेत विश्वका अधिकांश देशमा यसको असर देखिएको हो ।
अमेरिकापछि सबैभन्दा धेरै अर्बपति एशियामा विशेष गरी चीनमा रहेका छन् । चीनमा दैनिक एक अर्बपतिको उदय हुने गर्दछ । यसका बाबजुद चीनका अर्बपतिहरुको सम्पत्तिमा सबैभन्दा धेरै गिरावट देखिएको छ । उनीहरुको सम्पत्ति १२.३ प्रतिशतले घटेको छ ।
चीनको शेयर बजार, करेन्सी र आर्थिक वृद्धिदरमा गिरावट आएका कारण अर्बपतिहरुको सम्पत्तिमा गिरावट देखिएको बताइएको छ । योसँगै चीनमा ४८ जना अर्बपतिहरुको सूचीबाट बाहिरिएका छन् ।
यद्यपी पछिल्लो पाँच वर्षमा विश्वभर अर्बपतिको संख्या झण्डै ४० प्रतिशत बढेको प्रतिवेदनले देखाएको छ । २०१८ मा विश्वभर अर्बपतिको संख्या २ हजार १०१ पुगेको छ । पाँच वर्षअघि यो संख्या एक हजार ७५१ रहेको थियो । यद्यपी गत वर्षको मात्र तथ्यांक हेर्ने हो भने अमेरिका बाहेक अन्य देशका अर्बपतिहरुको संख्यामा कमी आएको छ ।
एशिया–प्यासिफिक क्षेत्रमा सबैभन्दा बढी ७५४ अर्बपति छन् । उनीहरूको समग्र सम्पत्ति २५ खर्ब डलर छ । एजेन्सी